काठमाडौँ । राष्ट्रपति रामचन्द्र पौडेलले भानु साहित्य उद्यान समितिका अध्यक्ष एवम् नेपाल सरकारका पूर्व सचिव विजयराज भट्टराईको निधनबाट आफू स्तब्ध भएको बताउँदै मुलुकले एक कर्मठ र निष्ठावान राष्ट्रसेवक गुमाएको बताएका छन् ।

स्वर्गीय भट्टराईका परिवारजनलाई बुधबार एक समवेदना सन्देश पठाउँदै राष्ट्रपति पौडेलले सो धारणा व्यक्त गरेका  हुन् ।

“मेडिसीटी अस्पतालमा उपचारकै क्रममा यही माघ २१ गते भट्टराइको दुःखद निधन भएको खबरले म स्तब्ध भएको छु, विद्यार्थी अवस्थादेखिनै अत्यन्त प्रखर र कर्मनिष्ठ व्यक्तित्व भट्टराईको निधन राष्ट्र र समाजको लागि अपुरणीय क्षति हो”, समवेदना सन्देशमा भनिएको छ । 

राष्ट्रपति पौडेलले स्वर्गीय भट्टराईको आत्माको चीर शान्तिको कामनासहित शोकाकुल परिवारजनमा गहिरो समवेदना प्रकट गरेका छन् ।

राष्ट्रपतिका प्रेस सल्लाहकार किरण पोखरेल र राष्ट्रपतिका सुपुत्री अवज्ञा पौडेलले सो समवेदना सन्देश भट्टराईको निवासमा गएर परिवारजनलाई हस्तान्तरण गरेका थिए ।