काठमाडौं । सिद्धार्थ हस्पिटालिटी २७औँ वर्षमा प्रवेश गरेको छ । सन् १९९८ मा कैलालीको टीकापुरमा सामान्य होटेलबाट सुरु भएको कम्पनीको यात्रा देशभर फैलिँदै २७ वर्ष पूरा गरेको हो ।

वार्षिकोत्सवका अवसरमा आयोजित एक कार्यक्रममा सिद्धार्थ ग्रुपका प्रमुख कार्यकारी अधिकृत (सीईओ) कृष्ण न्यौपानेले मुलुकको पर्यटन प्रवर्द्धन गर्दै सिद्धार्थलाई देशव्यापी बनाउने योजनाका साथ सिद्धार्थ ग्रुपले ‘भिजन २०३०’ मा काम गरिरहेको बताए ।

उनले सन् २०३० सम्म स्वदेश तथा विदेशमा समेत गरी कम्तीमा ५८ वटा साना तथा ठूला आउटलेट सञ्चालन गर्ने योजना बनाएको पनि जानकारी दिए । “हाल हामी नेपालका विभिन्न स्थानका साथै भारतमा समेत होटेल सञ्चालनको तयारी गरिरहेका छौँ, त्यसपछि अन्य देशमा पनि सेवा विस्तार गर्ने योजना छ,” उनले भने ।

गत वर्ष पृथ्वी राजमार्गको चुम्लिङटारमा रहेको सिद्धार्थ रिभरसाइड रिसोर्टले दक्षिण एसियाली ट्राभल अवार्ड (साटा)बाट उत्कृष्ट रिभर साइड रिसोर्टको अवार्ड पाएको थियो । साथै बौद्धस्थित सिद्धार्थ बुटिक होटेलले उत्कृष्ट बुटिक होटेलका रूपमा साटा अवार्ड प्राप्त गरेको थियो ।

सुर्खेतस्थित सिद्धार्थ रिसोर्टले कर्णाली प्रदेश सरकारबाट उत्कृष्ट एचआर प्राक्टिस (मानव संसाधन अभ्यास) अवार्ड प्राप्त गरेको थियो । त्यस्तै, विभिन्न आउलेटहरू उत्कृष्ट सेवा र आतिथ्यका लागि ट्राभलर च्वाइस अवार्डबाट समेत सम्मानित भएका थिए ।

विदेशमा सेवा विस्तारको योजना

मुलुकका विभिन्न स्थानमा सेवा विस्तार गरिरहेको सिद्धार्थ हस्पिटालिटीले अब चाँडै भारतमा पनि सेवा विस्तार गर्दै छ । त्यति मात्रै होइन, धनगढीमा पाँचतारे होटेलको योजना अगाडि बढाएको छ ।

सिद्धार्थले बुटवलको योगीकुटीमा सिद्धार्थ कटेज सञ्चालन गरेको छ, जसमा वाटर पार्क र यस क्षेत्रकै उत्कृष्ट सभा हल समेत निर्माण हुँदै छ । हाल रेस्टुरेन्टको काम पूरा भई सञ्चालनमा आइसकेको छ भने आगामी असारसम्ममा बाँकी काम पूरा हुने जनाइएको छ । कम्पनीले धनगढीमै पनि सिद्धार्थ कटेज निर्माण गरिरहेको छ ।

हाल सिद्धार्थ हस्पिटालिटीअन्तर्गतका विभिन्न आउटलेटमा दुई हजार ५०० भन्दा बढी प्रत्यक्ष कर्मचारी कार्यरत छन् । कम्पनीका अनुसार पूर्वमा बिर्तामोडदेखि पश्चिममा महेन्द्रनगरसम्म सेवा प्रवाह गरिरहेको कम्पनीले आफ्नै होटेल सञ्चालनका साथै अन्य होटेल व्यवस्थापन गरिरहेको छ ।