काठमाडौं । मधेसकेन्द्रित राजनीतिक दलका नेताले एकताबद्ध भएर मधेसी जनताको अधिकार स्थापित गर्न केन्द्रित हुने बताएका छन् । 

गजेन्द्रनारायण सिंहको २४औँ स्मृति दिवसका अवसरमा गजेन्द्रनारायण सिंह अध्ययन प्रतिष्ठानले बिहीबार काठमाडौंमा आयोजना गरेको कार्यक्रममा उनीहरूले मधेसको मुद्दालाई सशक्त रूपमा अघि बढाउन एकताबद्ध भएर जाने बताएका हुन् ।

राष्ट्रिय मुक्ति पार्टी, नेपालका अध्यक्ष राजेन्द्र महतोले गजेन्द्रनारायण सिंहलगायतका अग्रज नेताहरूको अभियान अझै पनि पूरा हुन नसकेकाले अब आफूहरू मिलेर सबैलाई अधिकार र पहिचान दिएरै छाड्ने बताए । उनले संविधान कुनै एक पार्टी वा व्यक्तिको नभएकाले समग्र देशको संविधान बनाउने गरी मुद्दा मिल्नेहरू एक हुनुपर्ने धारणा राखे । 

त्यस्तै, जनता समाजवादी पार्टी, नेपालका नेता राजकिशोर यादवले संविधानले सबै जनताको प्रतिनिधित्व गर्न नसकेकाले अब सर्वस्वीकार्य हुने गरी संशोधन गर्न अघि बढ्नुपर्ने उल्लेख गरे । 

संविधान संशोधनको सवालमा चलखेल गरेर भएका उपलब्धि हरण गर्ने र देशलाई गलत बाटोमा लैजान सक्ने चिन्ताका साथ मधेसकेन्द्रित दलहरू एक भएर खबरदारी गर्ने उनले बताए । 

त्यस्तै, जनता प्रगतिशील पार्टीका अध्यक्ष हृदयेश त्रिपाठीले मधेसकेन्द्रित दलहरू यसअघि पटक–पटक स्वार्थका कारण विभाजन हुनु दुःखद् भए पनि अब समान मुद्दालाई अघि बढाउन एक भएर अघि बढ्ने जिकिर गरे । उनले मधेसकेन्द्रित राजनीतिक दलबीच आगामी सोमबारसम्म छलफल गरेर समान एजेन्डा बनाउने बताए । 

त्यस्तै, अन्य दलका नेताहरूले पनि मधेसका मुद्दाहरूलाई अघि बढाउनका लागि एकताबद्ध भएर अघि बढ्नुपर्नेमा जोड दिएका थिए । 

गजेन्द्रनारायण सिंह मधेसकेन्द्रित दल नेपाल सद्भावना पार्टीका संस्थापक नेता हुन् । ०५७ सालमा उनको निधनपछि मधेसकेन्द्रित दलहरू तितरवितर भएका थिए ।