काठमाडौं । अमेरिकी राष्ट्रपति डोनाल्ड ट्रम्पले आर्टिफिसियल इन्टेलिजेन्स (एआई) पूर्वाधार निमार्ण गर्न निजी क्षेत्रको ५०० अर्ब अमेरिकी डलर लगानी घोषणा गरेका छन् । ट्रम्पले गत मंगलबार घोषणा गरेको यो लगानी ओपनएआई, सफ्टबैंक र ओराकलले गर्ने भएका हुन् ।

यी तीनवटै कम्पनीले ज्वाइन्ट भेञ्चर स्टारगेटमार्फत डाटा सेन्टर निमार्ण गर्न ५०० अर्ब अमेरिकी डलर लगानी गर्ने भएका हुन् ।

तीनवटै कम्पनी र स्टारगेटका अन्य लगानीकर्ताले एक सय अर्ब डलर तत्काल लगानी गर्न तयार रहेको बताएका छन् । बाँकी रकम चार वर्षमा लगानी गरिनेछ ।

सफ्टबैंकका सीईओ मासायोशी सन, ओपनएआईका सीईओ साम अल्टम्यान र ओराकलका अध्यक्ष ल्यारी एलिसन ह्वाइट हाउसमा ट्रम्पसँग भोजमा सहभागी भएका थिए ।

एलिसनले यो परियोजनाको पहिलो डाटा सेन्टर टेक्सासमा निर्माणाधीन रहेको बताएका छन् । करिब ५० हजार वर्गफिटको क्षेत्रफलमा २० डाटा सेन्टर निर्माण गरिने उनले बताएका छन् ।

विभिन्न किसिमका एआई मोडलहरूलाई सञ्चाल गर्ने यी डाटा सेन्टरले अमेरिकामा एक लाख रोजगारी सिर्जना गर्नेछ ।

यी डाटा सेन्टरले इलेक्ट्रोनिक स्वास्थ्य रेकर्डको विश्लेषण गरी डाक्टरहरूलाई बिरामीको हेरचाह गर्न सहयोग गर्ने ओराकलका अध्यक्ष एलिसनको भनाइ छ ।

तीन वटै कम्पनीले यो परियोजनाको श्रेय ट्रम्पलाई दिएका छन् । अल्टम्यानले आर्टिफिसियल जनरल इन्टेलिजेन्स नामक थप शक्तिशाली प्रविधिलाई उल्लेख गर्दै ट्रम्पबिना यो सम्भव नभएको टिप्पणी गरेका छन् ।

यसअघि गत मार्चमा ओपनएआई र माइक्रोसफ्टले एक सय अर्ब अमेरिकी डलरको परियोजनामा काम गरिरहेको समाचार बाहिरिएको थियो । उक्त परियोजनामा सन् २०२८ मा सार्वजनिक हुने भनिएको स्टारगेट नामक आर्टिफिसियल इन्टेलिजेन्समा आधारित सुपर कम्प्युटर पनि समावेश छ । 

यो पछिल्लो घोषणा त्यसैमा आधारित हो वा नयाँ योजना भन्ने स्पष्ट भइसकेको छैन । रोयटर्सबाट ।