काठमाडौं । जनता समाजवादी पार्टी, नेपालका अध्यक्ष उपेन्द यादवले प्रतिगमनकारी शक्तिहरू फेरि परिवर्तनलाई प्रतिगमनमा बदल्ने तयारीमा रहेको महसुस हुन थालेको बताएका छन् ।

बिहीबार काठमाडौंमा गजेन्द्रनारायण सिंहको २४औँ पुण्यतिथिको अवसरमा आयोजित कार्यक्रमपछि सञ्चारकर्मीहरूसँग कुरा गर्दै उनले यस्तो बताएका हुन् । उनले एकता, संघर्ष र रूपान्तरणको माध्यमबाट नै संसार अघि बढ्ने उल्लेख गरे ।

उनले अहिलेको आवश्यकता क्रान्तिकारी र परिवर्तन शक्तिहरूबीचको एकता रहेको उल्लेख गरे । एकतासँगै परिवर्तनविरोधी तागतको विरुद्ध संघर्षको आवश्यकता रहेको बताए । राजनीतिक प्रणालीमा समाजिक र आर्थिक प्रणालीमा रूपान्तरणको आवश्यकता रहेको बताए ।

उनले भने, "एकता, संघर्ष र रूपान्तरण तीन भाग हुन्छ । एकता, संघर्ष र रूपान्तरणको माध्यमबाटै दुनियाँ अघि बढ्छ । अहिलेको आवश्यकता क्रान्तिकारी र परिवर्तन शक्तिहरूबीचको एकता हो । क्रान्तिका, परिवर्तनका उपलब्धिहरू गुम्ने खतरा भयो, प्रतिगमनकारी शक्तिहरू फेरि परिवर्तनलाई प्रतिगमनमा बदल्ने तयारीमा छ । क्रान्तिकारी र परिवर्तनकारी शक्तिहरूको एकताको आवश्यकता छ । एकतासँगै परिवर्तनविरोधी तागतको विरुद्ध संघर्षको आवश्यकता छ । त्यो संघर्षसँगै राजनीतिक प्रणालीमा, समाजिक र आर्थिक प्रणालीमा रूपान्तरणको आवश्यकता छ ।"

अध्यक्ष यादवले मधेसवादी दलहरू फुट्दा प्राप्त उपलब्धि गुम्ने खतरा भएको उल्लेख गरे ।