काठमाडौं । जनता प्रगतिशिल पार्टीका अध्यक्ष हृदयेश त्रिपाठीले नेपाली कांग्रेस र नेकपा एमालेलाई आधा/आधा सिट बाँडेर निर्वाचन लड्न सुझाव दिएका छन् ।

बिहीबार काठमाडौंमा गजेन्द्रनारायण सिंहको २४औँ पुण्यतिथिको अवसरमा आयोजित कार्यक्रमपछि सञ्चारकर्मीहरूसँग कुरा गर्दै उनले दुईदलीय व्यवस्था र बहुमत चाहिएको भए आधा/आधा सिट बाँडेर लड्दा बहुमत आउने बताए । उनले आन्दोलन गर्दा सात दल चाहिने तर अहिले दुईदलीय व्यवस्थातिर लैजाने कुरा सह्य नभएको उल्लेख गरे । कांग्रेस र एमालेले लोकप्रियता हाँसिल गरेको भए जनताले गत निर्वाचनमै बहुमत दिने उनको भनाइ छ ।

"आन्दोलन गर्दा हामी सात दल चाहिने, अनि अहिले दुई दलको कुरा गरेर हुन्छ ? बहुदलीय व्यवस्था वा प्रणाली जुन हामीले अपनाएका छौँ । नेकपा एमालेका जो नेता हुनुहुन्थ्यो मदन भण्डारी । उहाँको जनताको बहुदलीय जनवादकै विपरीत हो दुईदलीय जनवाद । दुई दल भनेको कांग्रेस र एमाले उहाँले सोच्नुभएको होला । कांग्रेस र एमालेले यदि लोकप्रियता हाँसिल गरे भने त दुई दललाई बहुमत कसैलाई आइहाल्छ," उनले भने, "अर्को निःशुल्क सल्लाह के छ भने यदि बहुमत नै ल्याउने हो भने आधा–आधा सिट बाँडेर लडे भइगयो नि । त्यसको लागि संविधान संशोधन, नियमावली, कानुन केही हेर्नैपर्दैन ।"

आफ्नो अकर्मण्यताको दोष प्रणालीलाई दिन नहुने उनले बताए ।