site stats
बाह्रखरी :: Baahrakhari
विदेश
Global Ime bankGlobal Ime bank
Nabil Bank Banner adNabil Bank Banner ad
हैटीमा १० लाखभन्दा बढी मानिस विस्थापित

जेनेभा । हैटीमा गिरोह हिंसाका कारण घर छाडेर भागेका मानिसको संख्या गत वर्ष तीन गुणाले बढेर १० लाखभन्दा बढी पुगेको संयुक्त राष्ट्रसंघले मंगलबार जनाएको छ । 

संयुक्त राष्ट्रसंघको आप्रवासनका लागि अन्तर्राष्ट्रिय संगठन (आईओएम)ले आफ्नो पछिल्लो तथ्यांकले ‘१० लाख ४१ हजार मानिस धेरैपटक विस्थापित भएका र तीव्र मानवीय संकटको बीचमा संघर्ष गरिरहेका छन्’ भनेको छ ।  

“सन् २०२३ डिसेम्बरमा हामीले रेकर्ड गरेका हिंसाबाट लगभग तीन लाख १५ हजार मानिस विस्थापित भएका थिए,” आईओएमका प्रवक्ता केनेडी ओकोथ ओमोन्डीले पत्रकारलाई भने, “त्यसयताको एक वर्षमा हामीले यो संख्या तीन गुणाले बढेर हैटीमा गिरोह हिंसाका कारण अब १० लाखभन्दा बढी मानिस विस्थापित भएको देखेका छौँ ।”

राजधानी पोर्ट–अ–प्रिन्समा आइओएमले ‘निरन्तर गिरोह हिंसा, आवश्यक सेवाहरूको पतन–विशेष गरी स्वास्थ्य सेवा– र बढ्दो खाद्य असुरक्षाका कारण’ विस्थापन ८७ प्रतिशतले बढेको बताएको छ । 

यो गरिब क्यारेबियन देश दशकौँदेखि राजनीतिक अस्थिरताले ग्रसित छ र हालका वर्षहरूमा शक्तिशाली बन्दै गएका गिरोहहरूले झन् खराब बनाएका छन् ।

संयुक्त राज्य अमेरिका र संयुक्त राष्ट्रसंघको समर्थनमा केन्याको नेतृत्वमा रहेको प्रहरी सहयोग मिसन हुँदाहुँदै पनि हिंसा बढ्दै गएको छ ।

गत हप्ता संयुक्त राष्ट्रसंघको मानवाधिकार कार्यालयले हैटीमा बढ्दो गिरोह हिंसामा गत वर्ष पाँच हजार ६ सयभन्दा बढी मानिस मारिएको र हजारौँ घाइते वा अपहरण गरिएको बताएको थियो । 

“हैटीलाई अहिले नै जीवन बचाउन र सुरक्षा गर्न निरन्तर मानवीय सहायताको आवश्यकता छ,” आइओएमका महानिर्देशक एमी पोपले भने, “हामीले यति धेरै मृत्यु र विनाश निम्त्याएको हिंसा र अस्थिरताको मूल कारणहरूलाई सम्बोधन गर्न मिलेर काम गर्नुपर्छ ।” रासस/एएफपी

NIBLNIBL
प्रकाशित मिति: मंगलबार, माघ १, २०८१  १८:०४
worldlinkworldlink
प्रतिक्रिया दिनुहोस्
national life insurance newnational life insurance new
Ncell Side Bar LatestNcell Side Bar Latest
Bhatbhateni IslandBhatbhateni Island
Hamro patroHamro patro