पोखरा । जिल्ला प्रहरी कार्यालय कास्कीले सामाजिक सञ्जालमा ‘भाइरल’ तस्बिरका विषयमा प्रतिक्रिया जनाएको छ । कास्की प्रहरीको हिरासतमा रहेका राष्ट्रिय स्वतन्त्र पार्टी (रास्वपा)का सभापति रवि लामिछानेको भन्दै एउटा तस्बिर यति बेला सामाजिक सञ्जालमा चर्चित छ ।

स्पष्ट अनुहार नदेखिएको भए पनि रास्वपाका नेता–कार्यकर्ताले उक्त तस्बिर लामिछानेकै रहेको दाबी गरेका छन् । व्यक्तिको गोपनीयता भंग गरिएको भन्दै उनीहरूले कास्की प्रहरीको आलोचना गरिरहेका छन् । केही मानिसले भने लामिछानेलाई उच्च सुविधा दिइएको भन्दै विरोध जनाएका छन् ।

प्रहरीले उक्त तस्बिर लामिछानेकै भएको पुष्टि गरेको छ । त्यो तस्बिर आफूलाई सामाजिक अभियन्ता दाबी गर्ने डा. निकोलस भुसालले गएको सोमबार राति १० बजेतिर पहिलोपटक सामाजिक सञ्जाल फेसबुकमा पोस्ट गरेका थिए । पछि रास्वपाका नेताहरूले त्यसलाई फैलाउँदै टिप्पणी गर्न थालेपछि भुसालले उक्त तस्बिर हटाए । यद्यपि, भुसालले उक्त तस्बिर आफूले नै खिचेको र सार्वजनिक गरेको भन्दै जिम्मेवारी लिएका छन् ।

कास्की प्रहरीले भुसालको यो कार्यलाई साइबर कानुनको उल्लंघन भनेको छ । जिल्ला प्रहरी कार्यालय कास्कीका सूचना अधिकारी एवं प्रहरी नायब उपरीक्षक वसन्तकुमार शर्माले विज्ञप्ति जारी गर्दै ‘सहकारी ठगी, संगठित अपराध र सम्पत्ति शुद्धीकरण कसुरको तथ्यपूर्ण अनुसन्धानलाई नकारात्मक प्रभाव पार्ने गरी तस्बिर प्रकाशन भएको’ जनाएका छन् ।

‘प्रहरीको व्यावसायिकतामा आँच आउने किसिमले विभिन्न सामाजिक सञ्जालमा सम्प्रेषित अनधिकृत तस्बिर’प्रति आफूहरूको गम्भीर ध्यानाकर्षण भएको उनले उल्लेख गरेका छन् ।

‘तस्बिर सार्वजनिक गर्नेलाई सूचनाको हकसम्बन्धी ऐन, २०६४ मा व्यवस्था भएबमोजिम अपराध अनुसन्धान, तहकिकात तथा अभियोजनमा गोपनीयता कायम गर्नुपर्ने व्यवस्था र साइबर अपराधसम्बन्धी कानुनी प्रावधानलाई समेत उल्लंघन गरेको हुँदा कानुनी दायरामा ल्याइने’ प्रहरीले जनाएको छ ।