काठमाडौं । अभिनेत्री केकी अधिकारी नयाँ चलचित्र निर्माणको तयारीमा जुटेकी छन् । ‘बोक्सीको घर’बाट सिनेमा निर्माणमा समेत प्रवेश गरेकी केकी नयाँ चलचित्र निर्माणको तयारीमा छिन् । 

उनले निर्माणको तयारी गरेको चलचित्र ‘बोक्सीको घर–२’ हो ? “बोक्सीको घर–२’ प्रोजेक्ट अहिले हाम्रो पाइपलाइनमा छैन । यदि, बोक्सीको घर–२ बनायौँ भने पनि केही वर्ष पछि मात्रै हुन्छ,” जवाफमा केकी बाह्रखरीसँग भन्छिन्, “अहिलेलाई हामीसँग अर्कै प्रोजेक्ट छ ।” 

तत्काललाई अर्कै चलचित्र निर्माण गरे पनि केकीले ‘बोक्सीको घर–२’ निर्माणको सम्भावनालाई भने नकारिनन् । अहिले तयारी भइरहेको चलचित्र निर्माण गरिसकेपछि ‘बोक्सीको घर–२’को सम्भावना रहेको उनले संकेत गरिन् ।  

अहिले केकीले नयाँ चलचित्रका लागि स्क्रिप्ट लक्ड गरिसकेकी छन् । स्क्रिप्टको काम सकिए पनि निर्देशक र कलाकार भने फाइनल भइनसेकेको उनको भनाइ छ । 

“स्क्रिप्टको काम सकियो, अब विस्तारै निर्देशक र कलाकार फाइनल गरेपछि सिनेमा निर्माणको घोषणा गर्नेर्छौं,” उनले भनिन् । 

‘बोक्सीको घर’ले नेपाली बक्सअफिसमा ११ करोडभन्दा माथि ग्रसकलेक्सन गरेको थियो ।