काठमाडौं । सामाजिक सञ्जालको माध्यमबाट आफूलाई ‘एक्सप्लोर’ गरेर रंगीन दुनियामा करिअर बनाउनेहरूको संख्या ठूलो छ । टिकटकमा लोकप्रिय भएपछि सिनेमा र म्युजिक भिडियोमा आउनेहरूको लर्को छ ।

अहिले हलमा चलिरहेको चलचित्र ‘होस्टेल–३’मा अभिनय गरेका पारस बम (कुल ब्वाई) टिकटकको बाटो हुँदै चलचित्रमा आइपुगेका हुन् । सिनेमाको प्रचारका क्रममै उनी आफूलाई टिकटकमा जस्तै ‘होस्टेल–३’मा पनि साथ दिन भनिरहेका थिए ।

चलचित्र टिमवर्क हो, कोही एक व्यक्ति विशेषले चल्दैन । त्यसैले पारसका कारण मात्रै यो चलचित्र चल्यो भन्न त नमिल्ला तर यस सिनेमाले सकारात्मक प्रतिक्रिया पाइरहेको छ ।

टिकटकलाई भर्‍याङ बनाएर चलचित्रको यात्रा तय गर्ने अर्को नाम हो, मिस पबी । अर्थात्, पवित्रा साकी ।

टिकटमा भाइरल भएपछि उनले म्युजिक भिडियोमा अवसर पाइन् । ‘मेरी बास्सै’लगायत टेलिचलचित्रमा काम गरिसकेकी उनी ‘कमेडी दरबार’ नामक टेलिभिजन शोमा पनि काम गरिरहेकी छन् । 

उनको करिअर म्युजिक भिडियो, टेलिचलचित्र, टेलिभिजन शो हुँदै अहिले चलचित्रमा उक्लिएको छ । उनी ‘माग्ने राजा’मार्फत नेपाली रजतपटमा डेब्यू गर्न लागेकी हुन् । 

केदार घिमिरे मुख्य भूमिकामा रहेको यस चलचित्रलाई ऋषि लामिछानेले निर्देशन गरिरहेका छन् ।

यसअघि, ‘राजमहल’बाट डेब्यू गर्ने भनिए पनि यो सिनेमा विभिन्न कारणले बन्न सकेन । सुरुमा ‘ह्वाइट हाउस’ नाम राखिएको यस चलचित्रको पछि नाम परिवर्तन गरेर ‘राजमहल’ राखिएको थियो । 

‘राजमहल’ समयमा खिच्न नसक्दा ‘माग्ने राजा’ मिस पवीको डेब्यू सिनेमा बन्ने भएको हो । 

गरिमा शर्मा पनि टिकटकको माध्यम हुँदै म्युजिक भिडियो र चलचित्रमा प्रवेश गरेकी कलाकार हुन् । दर्जनौँ म्युजिक भिडियोमा काम गरेपछि उनी चलचित्रमा आइन् । 

गरिमाको पहिलो चलचित्र ‘लन्डन टू पेरिस’ हो । गत वर्ष रिलिज भएको यस चलचित्रलाई घनश्याम लामिछानेले निर्देशन गरेका थिए ।

त्यसयता उनी बाक्लै संख्यामा चलचित्रमा काम गरिरहेकी छन्, उनी । ‘ह्रस्व दीर्घ’, ‘बर एन्ड बधु’ गरिमाले काम गरेका चलचित्र रिलिज भइसकेका छन् । ‘जन्ते बाख्रो’मा पनि गरिमाले काम गरेकी छन् ।

सिम्रन पन्त पनि टिकटकको बाटो हुँदै चलचित्रमा आइपुगेकी कलाकार हुन् । सुनसरीको मधेसाकी उनी अभिनय सिकेर चलचित्रमा आइपुगेकी हुन् । सुरुदेखि नै नृत्य गर्ने उनी अभिनयको यात्रा सुरु गरेकी हुन् । 

प्रिन्सी र प्रिज्मा खतिवडा पनि टिकटकबाट हिट भएको जोडी हो । जुम्ल्याहा दिदीबहिनीको यो जोडीले सयौँ म्युजिक भिडियोमा अभिनय गरिसकेको छ । 

प्रिन्सी हिन्दी म्युजिक भिडियोमा पनि व्यस्त हुन थालेकी छन् । उनले भारतमा पुगेर काम गरिरहेकी छन् । 

बलिउडको चर्चित कम्पनी ‘टी–सिरिज’को ‘जान देंगे तुम्हे’ गीतको भिडियो, ‘बारिसे’, ‘हो जाने दो’लगायत हिन्दी गीतमा प्रिन्सीले मोडलिङ गरिसकेकी छन् ।

टिकटकबाट रंगीन दुनियामा फड्को मारेको अमर र अमृत दाहालको जोडी पनि हो । टिकटकमा हिट रहेको यो जोडीले एकपछि अर्को म्युजिक भिडियोमा काम गरिरहेको छ । यो जुम्ल्याहा दाजुभाइको पुरुष जोडी हो । 

नाटक, नृत्य हुँदै अमर र अमृत टिकटकमा आइपुगेका थिए । त्यसबाट उनीहरू म्युजिक भिडियोमा ‘सिफ्ट’ भएका हुन् । थुप्रै म्युजिक भिडियोमा काम गरेका उनीहरूले रियालिटी शो ‘डान्सिङ विथ स्टार’मा पनि भाग लिएका थिए । 

टिकटकमा लोकप्रिय भएपछि मोडलिङमा आउनेको संख्या ठूलो छ । टिकटकमा ‘भाइरल’ भएपछि मोडलिङमा आउनेमा सुधीर श्रेष्ठ, दीपा–दमन्ता श्रेष्ठ, गीता ढुंगाना, स्मारिका ढकाल–सामारिका ढकाल, बिना राउत, उषा उप्रेतीलगायत थुप्रै छन् । 

सुरुमा म्युजिक भिडियोमा आएपछि उनीहरू चलचित्रमा प्रवेश गर्ने गरेका छन् । पछिल्लो समय टिकटक नै गीत र चलचित्रको प्रचार गर्ने मुख्य माध्यम बनेपछि म्युजिक भिडियो निर्देशक र केही चलचित्र निर्देशकले पनि लोकप्रिय टिकटकरलाई लिने गरेका छन् । 

चलचित्रभन्दा पनि गीतको प्रचारको सबैभन्दा बलियो माध्यम नै टिकटक र टिकटकर बनिरहेका छन् । त्यसैले उनीहरूलाई पारिश्रमिक दिएर अथवा आग्रह गरेर ‘पब्लिसिटी’ गर्नु परेपछि म्युजिक भिडियो निर्देशकले आफ्नो गीतको भिडियोमा टिकटकरलाई लिने गरेका हुन् ।