काठमाडौं । चलचित्र ‘राजागंज’ सेन्सरमा रोकिएको छ । केन्द्रीय चलचित्र जाँचपास समिति (सेन्सर बोर्ड)ले केही शब्द र सामग्रीमा आपत्ति जनाउँदै सच्याएर आउन निर्माणपक्षलाई सुझाएको छ । 

चलचित्रमा ‘कुहिएको आँप’ भन्ने शब्द प्रयोग भएपछि सेन्सरले आपत्ति जनाएको हो । चलचित्र सेन्सर भइरहेका बेला सेन्सर बोर्डमा उपस्थित एक व्यक्तिले बाह्रखरीसँग भने, “ त्यो शब्द (कुहिएको आँप)मा आपत्ति भएको संकेत देखिएको थियो ।” 

यो शब्द हटाउन सेन्सरले सुझाएपछि निर्माणपक्षले चलचित्रको मर्म नै मर्ने भन्दै नहटाउने अडान लिएको थियो । तर, सेन्सरले राख्ने भए प्रधानमन्त्रीको कार्यालयबाट अनुमतिसहितको पत्र लिएर आउन भनेको स्रोतको भनाइ छ । 

यो सँगै अन्य केही सामग्रीमा पनि सेन्सरले आपत्ति जनाएर हटाएर ल्याउन भनेको छ । “अहिलेको राजनीतिका एक चर्चित पात्र र केही समयअगाडिका एक प्रधानन्यायाधीशको अन्तर्वार्ता चलचित्रमा राखेको पाइयो,” सेन्सर बोर्डका सदस्य ऋषिराज आचार्यले बाह्रखरीसँग भने, “सन्दर्भ नै नभएको अन्तर्वार्ता नराख्नुस् । यसले पछि लफडा मात्र ल्याउँछ । अर्काको सम्पत्ति प्रयोग गर्ने भए अनुमति ल्याउनुस् भनेर हामीले भनेका छौँ ।” 

‘कुहिएको आँप’को प्रसंगबारे आफूलाई केही जानकारी नरहेको बताएका ऋषिराजले अन्तर्वार्ता कसको हो भन्नेबारे पनि प्रष्ट पार्न चाहेनन् । यो हटाउन वा राख्ने भए अनुमति लिएर आउन सेन्सरले निर्माणपक्षलाई सुझाएको छ । 

‘राजागंज’ नेपालमा चैत १ गतेबाट प्रदर्शनमा आउँदै छ । दीपक रौनियारको निर्देशन रहेको चलचित्र ‘राजागंज’ले २०७२ सालमा संविधान जारी भएपछि विरोधमा भएको मधेस आन्दोलनलाई केन्द्रमा राखेर कथा भन्नेछ । मधेस आन्दोलन चर्किरहँदा अपहरणमा परेका सभासद र प्रधानध्यापकका छोरालाई मुक्त गराउन प्रहरीले चालेको खोजी अप्रेसनको कथा यो सिनेमाले देखाउनेछ । 

चलचित्रमा आशा मगराती, दयाहाङ राई, विजय बराल, ऋचा शर्मा, पशुपति राई, पूर्वमिस नेपाल निकिता चाण्डक, गौमाया गुरुङ, पुष्पा यादव, आरती मण्डल, घनश्याम मिश्र, परमेश्वर कुमार झा, नीरज श्रेष्ठलगायतको अभिनय छ ।

चलचित्रको निर्माणमा आदि फिल्मसका तर्फबाट निर्देशक रौनियार र अभिनेत्री मगराती, बासुरी फिल्मसका तर्फबाट रामबाबु गुरुङ र मनिराम पोखरेल, अभिनेता दयाहाङ राई तथा तन्हाउसर गेटका तर्फबाट एलन आर मिलिगनले सहकार्य गरेका छन् ।

यो सिनेमालाई नेपालमा टिफल्क र ब्यांकटेश इन्टरटेनमेन्टले संयुक्त रुपमा रिलिज गर्ने भएका छन् ।