काठमाडौं । कलाकार जितु नेपालले आफैँ चलचित्र निर्माण गर्ने भएका छन् । अरुको निर्माण र निर्देशनका चलचित्रमा अभिनय गरिरहेका जितु आफैँ चलचित्र निर्माण र निर्देशनमा होमिन लागेका हुन् । 

“अहिले स्क्रिप्टमा काम गरिरहेको छु । स्क्रिप्टको काम सकिएपछि सिनेमाका लागि कास्टिङ गर्नेछु,” जितुले बाह्रखरीसँग भने, “चलचित्रको निर्देशन पनि म आफैँ गर्नेछु ।” 

बजारमा अहिले रोजाइमा रहेका कलाकार नै सिनेमामा रहने उनको भनाइ छ । चलचित्रको मुख्य भूमिकामा जितु स्वयं हुनेछन् । 

चलचित्र कमेडीबेसमा बन्ने उनको भनाइ छ । सानो बजेटमा चलचित्र निर्माण गर्ने योजना रहेको उनले सुनाए । 

“अहिलेसम्म काम गरेको अनुभव र त्यसको सिकाइका आधारमा अब आफैँ पनि निर्माणमा लागौँ कि भनेर निर्माणको तयारीमा जुटेको छु,” जितु अगाडि थप्छन्, “विषय राम्रो भएकाले पनि निर्देशनमा आँट गरेको हुँ ।” 

चलचित्र विसं. २०८२ अन्तिमसम्म रिलिज भइसकक्ने उनको भनाइ छ । 

केही समयअगाडि जितु मुख्य भूमिकामा रहेको चलचित्र ‘ज्वाइँ साब’ रिलिज भएको थियो ।