काठमाडौं । ओपनर तथा कप्तान अनिल शाहको उत्कृष्ट ब्याटिङप्रेरित नेपाल प्रिमियर लिग (एनपीएल) जनकपुर बोल्ट्सले कर्णाली याक्सविरुद्ध आठ विकेटको सहज जित निकालेको छ । 

प्रतियोगितामा जनकपुरको यो लगातार दोस्रो जित हो । यसअघि जनकपुरले पहिलो खेलमा विराटनगर किंग्स्विरुद्ध आठ विकेटको जित निकालेको थियो ।

जनकपुरको जितमा ओपनर अनिलले ६२ रन बनाए । उनले ४२ बलमा ६ चौका र तीन छक्का प्रहार गरे । अनिलले पहिलो विकेटका निम्ति अर्का ओपनर आसिफ सेखसँग ९.४ ओभरमा ८४ रनको साझेदारी गरेका थिए । यो जारी एनपीएलमा ओपनिङ जोडीले बनाएको अहिलेसम्मकै ठूलो साझेदारी हो । 

मौसम ढकालको बलमा देव खनालबाट क्याच हुनुअघि २९ बलमा दुई चौका र दुई छक्कासहित ३६ रन बनाए । लहिरु मिलान्थाले १३ बलमा दुई चौका र दुई छक्कासहित २४ रन बनाए । उनी १२.५ ओभरमा जिसान मक्सुदबाट एलबीडब्लूको धरापमा परे । 

कर्णालीका जिसान मक्सुद र मौसमले समान एक विकेट लिए । 

पहिलो इनिङः अन्तिम दुई ओभरमा सोमपाल र अर्जुनले बनाए ४३ रन 

कीर्तिपुरस्थित त्रिवि क्रिकेट मैदानमा टस जितेर ब्याटिङमा आएको कर्णालीले निर्धारित २० ओभरमा सात विकेट गुमाएर १४२ रनको योगफल खडा गर्‍यो । जनकपुरका हर्ष थाकेरले गरेको १९औँ ओभरमा अर्जुन घर्तिले दुई छक्का र दुई चौकासहित कुल २४ रन बनाए । यस्तै, २०औँ ओभरमा सोमपाल कामीले २१ रन बनाएपछि कर्णाली प्रतिस्पर्धात्मक लक्ष्यसम्म पुगेको हो ।

कर्णालीका अर्जुन घर्तीले सर्वाधिक ३३ रन बनाए । १९औँ ओभरमा २४ रन बनाएका उनले २२ बलमा दुई चौका र दुई छक्का प्रहार गरे । ७९–६ को कठिन स्थितिबाट अर्जुनले कप्तान सोमपालसँग ५६ रनको साझेदारी गर्दै कर्णालीको इनिङ सम्हालेका थिए । अन्तिमसम्म अविजित रहेका सोमपालले १३ बलमा तीन चौका र एक छक्कासहित २९ रन बनाए । गुल्सन झाले ३६ रन बनाए । उनले २७ बलमा एक चौका र तीन छक्का प्रहार गरे । ओपनर शिखर धवनले १४ बलमा तीन चौकासहित १४ रन थपे । बाबर हायातले १२ रन जोडे । 

पहिलो इनिङको कुनै पनि समयमा कर्णालीले साझेदारी बनाउन सकेन । जनकपुरका मोहमद मोहसिनले दुई विकेट लिए । यस्तै, किशोर महतो, ललितनारायण राजवंशी, हर्ष थाकेर र जिम्मी निसमले समान एक विकेट लिए । कर्णालीले ६ ओभरभित्र ओपनरद्वय शिखर धवन र देव खनाललाई गुमाएको थियो । 

शिखरलाई हर्ष थोकरको पाँचौँ ओभरको दोस्रो बलमा बोल्ड गरे । शिखरले टिमको खातामा १४ रन बनाए । त्यसअघि कर्णालीले दोस्रो ओभरको दोस्रो बलमा ओपनर देव खनाललाई गुमाएको थियो । जनकपुरका ललितनारायण राजवंशीबाट बोल्ड हुनुअघि देवले टिमको खातामा एक रन थपे । कर्णालीका चान्डविक वाल्टनलाई सातौँ ओभरको अन्तिम बलमा मोहमद मोहसिनले एलबीडब्लूको धरापमा पारे । यस्तै, आठौँ ओभरको चौथो बलमा जिसान मक्सुदलाई जनकपुरका जिमी निसमले एलबीडब्लूलको धरापमा पारे । कर्णालीका बाबर हायात चौधौँ ओभरको दोस्रो बलमा मोहसिनले निसमबाट क्याच गराए । 

कर्णालीबाट सबैभन्दा धेरै रन बनाएका गुल्सन झा १६औँ ओभरको दोस्रो बलमा किशोर महतोबाट बोल्ड भए । २०औँ ओभरको चौथो बलमा अर्जुन घर्ती जिम्मी निसमबाट रनआउट भए । प्रतियोगितामा कर्णालीको यो पहिलो खेल हो । 

सोमबारको पहिलो खेलमा चितवन राइनोजले काठमाडौं गुर्खाजविरुद्ध पाँच विकेटको जित निकालेको थियो । प्रतियोगितामा मंगलबार दुई खेल हुनेछन् । दिनको पहिलो खेलमा सुदूरपश्चिम रोयल्स र विराटनगर किंग्स् भिड्दा दोस्रो खेलमा पोखरा एभेन्जर्स र चितवन राइनोज मैदान उत्रिनेछन् ।