काठमाडौं । मलेसियाको क्वालालम्पुरमा ६१ औं एसिया प्यासिफिक फिल्म फेस्टिभल सुरु भएको छ । एसियाली सिनेमा क्षेत्रको उत्सवका रूपमा मानिएको यो फेस्टिभल एसिया–प्यासिफिक क्षेत्रका चलचित्र निर्माताहरूको महासंघ (एफपीए)ले आयोजना गरेको हो ।

नेपालबाट पहिलोपटक चलचित्र निर्देशक सुर्वण थापाले एसिया प्यासिफिक फिल्म फेस्टिभल समितिमा प्रतिनिधिमण्डलको प्रतिनिधित्व गरेका छन् । एसिया–प्यासिफिक चलचित्र निर्माता महासंघ (एफपीए)को बोर्ड बैठकमा निर्देशक थापाले सांस्कृतिक आदानप्रदान बढाउन चलचित्रको भूमिकाबारे टिप्पणी गरेका छन् ।
 
कार्यक्रममा उनले नेपाली चलचित्र उद्योगमा आफ्नो यात्रा सुनाउँदै यस क्षेत्रको विकास, चुनौती र नेपाली चलचित्रको विश्वव्यापी सम्भावनाबारे विचार राखेका थिए । 

थापाको सहभागिता फेस्टिभलका लागि महत्वपूर्ण कोसेढुंगा भएको महासंघले जनाएको छ । एसिया प्यासिफिक फिल्म फेस्टिभल कमिटीमा उनी प्रवेश गर्नु सिनेमामा थापाले योगदानको कदर भएको महासंघको भनाइ छ ।

एसिया प्यासिफिक फिल्म फेस्टिभलले यस क्षेत्रको चलचित्र उद्योगसँग सहकार्य बढाउँदै यसलाई विश्वमञ्चमा विस्तार गर्दै लैजाने अपेक्षा राखेको छ ।