काठमाडाैं । समुन्द्र भट्ट निर्देशित चलचित्र ‘गुन्यो चोलो–कमिङ अफ अ्याज अफ अ गर्ल’ उर्फ ‘गुलाबी’का निर्माता आकाश बुढाथोकीले अमेरिकाको पीजीए मार्क (प्रोडयुसर गिल्ड अफ अमेरिका) पाएका छन् । 

आकाशले नेपालका तेस्रोलिंगीहरूको पहिचान र सामाजिक चुनौतिहरूको खोजी गर्ने प्रकारको नेपाली चलचित्र बनाएकोमा यो अर्वाड प्राप्त गरेका हुन् । यो मार्कले नेपाली चलचित्र उद्योगमा बुढाथोकीको योगदान र नेपाली सिनेमालाई विश्वव्यापी मञ्चमा पुर्याउन उनको भूमिकालाई दर्शाउने निर्माण पक्षले जारी गरेको प्रेस नोटमा उल्लेख छ ।  

यो चलचित्र केही समय अघिमात्र अमेरिकाको प्रतिष्ठित फोटो फिल्म मार्केटमा पनि छनोट भएको थियो । 

अमेरिकी कम्पनी ‘भिजन इन्टरटेन्मेन्ट’ र ‘दि स्काई ओसन इन्टरटेन्मेन्ट’को ब्यानरमा निर्माण भएको चलचित्रले पारलैंगिकताको कथालाई उठान गरेको छ । जहाँ नाजिर हुसेनले पारालैंगिक महिला (ट्रान्सवुमन)को भूमिका निर्वाह गरेका छन् । 

चलचित्रमा समुन्द्र भट्टसँगै नाजिर हुसेनको पटकथा तथा संवाद छ । नाजिरसँगै चलचित्रमा अभिनेत्री संचिता लुइँटेल, सुशील सिटौला, अनुपम श्रेष्ठ र विशाल पहारीलाई पनि मुख्य भूमिकामा देख्न सकिन्छ । 

चलचित्रको अन्तर्राष्ट्रिय वितरण अधिकार अमेरिकाको बफेलो एट्ले खरिद गरेको छ । यो चलचित्रलाई फेस्टिभल सर्किटपछि नेपालमा प्रदर्शन गरिने निर्देशक भट्टले जानकारी दिएकी छिन् । चलचित्रमा हलिउडकी भ्वाइस आर्टिस्ट लिजा जेरार्डले स्वर दिएकी छिन् । ब्याकग्राउन्ड म्युजिकको सम्पूर्ण काम मार्सेलो दि फ्रान्सिसीले गरेका छन् । 

यो चलचित्रमा आकाश बुढाथोकी र भि भन्से जानुबोनको लगानी छ । चलचित्रको कार्यकारी निर्माता जेफ्री जे वेन र स्टिभ जोन्स्टन हुन भने अनुपम श्रेष्ठ चलचित्रका सहयोगी निर्माता हुन् । 

आलोक शुक्लाले खिचेको चलचित्रमा लेखु सहयात्रीको गीत रचना र विजय बस्यालको प्रोड्क्सन डिजाइन छ ।