काठमाडौं । ललितपुरको हरिहर भवनस्थित राष्ट्रिय सहकारी विकास बोर्ड भवनमा अनधिकृत रूपमा बनाइएको पर्खाल भत्काइएको छ । 

जिल्ला, उच्च र सर्वोच्च अदालतले समेत सो पर्खाल अनधिकृत रूपमा बनाएको फैसला सुनाएपछि ललितपुर महानगरपालिकाले आइतबार बिहान डोजर लगाएर सो भवनको सडकतिरको पर्खाल भत्काएको हो । २०७३ साल पुस १८ गते अनधिकृत रूपमा बनाइएको सो भवनको पर्खाल सर्वोच्च अदालतले समेत भत्काउने आदेश दिएपछि आज डोजर चलाएर भत्काइएको नगरप्रहरी प्रमुख सीताराम हाछेथूले जानकारी दिए । 

उनले भने, “२०७३ पुस १८ गते राष्ट्रिय सहकारी विकास बोर्डले यो अनधिकृत रूपमा बनाएकाले ललितपुर उपमहानगरपालिकाको तत्कालीन निर्णयअनुसार हालसम्म विभिन्न कारणले मुद्दाहरू हाल्यो । सम्मानित उच्च अदालत, सर्वोच्च अदालतबाट भत्काउने फैसला गरेका कारण आज हामीले यो भत्काएको हो ।” 

सो अनधिकृत रूपमा बनाइएको पर्खाल भत्काउने क्रममा ठूलो संख्यामा नगर प्रहरी परिचालन गरिएको थियो ।