काठमाडौं । तेस्रो टेस्टमा न्युजिल्यान्डले भारतलाई २५ रनले पराजित गरेको छ । योसँगै न्युजिल्यान्डले तीन खेलको सिरिज ३–० ले जितेको छ । न्युजिल्यान्डले पहिलोपटक भारतमा टेस्ट सिरिज जितेको हो  ।

भारतीय टोली २४ वर्षपछि घरेलु मैदानमा क्लिन स्विप भएको हो । यसअघि, सन् २००० मा भारत दक्षिण अफ्रिकासँग दुई म्याचको टेस्ट सिरिजमा क्लिन स्विप भएको थियो । तीन वा सोभन्दा बढी टेस्ट म्याचको घरेलु शृंखलामा पहिलोपटक भारतीय टोली क्लिन स्विप भएको हो ।

भारत बेंगलुरु टेस्टमा आठ विकेटले र पुणे टेस्टमा ११३ रनले पराजित भएको थियो ।

मुम्बईको वानखेडे स्टेडियममा भएको खेलमा न्युजिल्यान्डले टस जितेर पहिले ब्याटिङ गर्दै आफ्नो पहिलो इनिङ्समा २३५ रन बनाएको थियो । जवाफमा भारतीय टोली पहिलो इनिङ्समा २६३ रनमा अलआउट भएको थियो । भारतसँग २८ रनको अग्रता थियो ।

जवाफमा न्युजिल्यान्डले दोस्रो इनिङ्समा १७४ रन बनायो । भारतलाई १४७ रनको लक्ष्य थियो । जवाफमा भारत १२१ रनमा अलआउट भयो ।

भारतका लागि दोस्रो इनिङ्समा ऋषभ पन्तले सर्वाधिक ६४ रन बनाए । न्युजिल्यान्डका लागि अजज पटेलले ६ विकेट लिए । खेलमा इजाजले ११ विकेट लिए । उनी खेलको 'प्लेयर अफ द म्याच' चुनिए ।