काठमाडौं । प्रतिनिधिसभा र प्रदेशसभाअन्तर्गत प्रत्यक्षतर्फको मतगणना सकिएको छ । अन्तिम मत परिणामअनुसार वाम गठबन्धनको मुख्य घटक नेकपा एमालेले प्रतिनिधिसभातर्फ ८० स्थानमा जित हासिल गरेको छ । त्यस्तै, गठबन्धनको अर्को दल माओवादी केन्द्र ३६ स्थानमा निर्वाचित भएको छ । समानुपातिकसमेतको प्रारम्भिक मत परिणामलाई हेर्ने हो भने वामपन्थी सुविधाजनक बहुमतको स्थानमा छ ।

चुनावअघि तालमेल र चुनावपछि पार्टी एकतासँगै राजनीतिक स्थायित्व र स्थायी सरकारको नारा लिएर चुनावमा गएका दुई वामपन्थीका मुद्दा जनताले स्वीकार गरेको जनतमले देखाएको छ ।

त्यसो त, पार्टी एकता र बहुमतसहितको वामपन्थी सरकार निर्माणको एजेन्डालाई जनताले अभिमतद्वारा अनुमोदन गरेको रूपमा पनि अथ्र्याउन सकिन्छ । 

गुल्मी– १ बाट नवनिर्वाचित सांसद एवम् एमाले सचिव प्रदीप ज्ञवाली दुई वामपन्थी पार्टीबीचको तालमेल र एकतालाई जनताले अनुमोदन गरिदिएको रूपमा अथ्र्याउँछन् । “यो एकता प्रक्रिया कार्यकर्ता तहबाट सुरू भएको होइन, नेतृत्वबाटै सुरू भएको प्रक्रियालाई जनताले अनुमोदन गरेका छन्,” उनले प्रष्ट्याए ।

‘चुनावी परिणाम अनपेक्षित होइन’

दुई वामपन्थी मिल्दा सुविधाजनक बहुमत आउने र स्थीर सरकार गठन हुन्छ भनेर नै निर्वाचनमा होमिएकाले परिणाम अपेक्षित नै भएको ज्ञवालीको तर्क छ । “यो परिणाम अनपेक्षित होइन, परिणामले वामपन्थी एकताको दिशामा मुलुक अघि बढेको छ, यसबाट हामी उत्साहित छौँ,” उनले बाह्रखरीसँगको संक्षिप्त कुराकानीमा भने । उनले निर्वाचन परिणामसँगै नयाँ युगको सूत्रपात भएको टिप्पणी गरे । “अस्थिरताको युग समाप्त भएर हामी नयाँ युगमा प्रवेश गरेका छौँ,” उनले थपे ।

‘चुनावी परिणामले पार्टी एकतामा उत्साह’

चुनावी परिणामले पार्टी एकतामा बल पुगेको ज्ञवालीको दाबी छ । “मत परिणामले पार्टी एकता सुनिश्चित भएको सन्देश दिएको छ,” उनको  भनाइ थियो ।

एकता नचाहनेहरूले विभिन्न तर्क गरिरहेको बताउँदै उनले माओवादी केन्द्र र एमालेबीच छिट्टै एकताको प्रक्रिया सुरू हुने दाबी गरे । “सरकार गठन र पार्टी एकताको प्रक्रिया सँगै अघि बढ्छ र छिट्टै निष्कर्षमा पुग्छ,” उनको प्रष्टोक्ति थियो ।

वामपन्थीबीचको तालमेल र एकताका विषयमा थुप्रै संशय रहेको भए पनि यो मत परिणामले त्यसलाई चिरेको जिकिर उनको थियो । गठबन्धनको मर्म, भावना र जनादेशअनुसार नै एमाले अघि बढ्ने बताउँदै ज्ञवालीले एकताको विषयमा द्विविधा पाल्नु नपर्ने तर्क गरे ।

अधिनायकवादको तर्क ‘ननसेन्स’

उनले वामपन्थी सरकारमा पुगेपछि अधिनायकवाद आउँछ भनेर अझै पनि कतिपयले तर्क गरिरहेको बताउँदै यस्तो ‘ननसेन्स’ कुराको पछि नलाग्न अनुरोधसमेत गरे । गठबन्धन लोकतन्त्रप्रति कृतसंकल्पित रहेको बताउँदै उनले अबको दिशा भनेको स्थायीत्व र विकास नै भएको बताए । लोकतत्त्रको मूल्य, मान्यता, भावनाअनुरूप नै गठबन्धन अघि बढ्ने भएकाले कोही द्विविधामा बस्नु नपर्ने उनको अनुरोध थियो ।

माओवादी भन्छ– पार्टी एकताबारे शंका नगर्नू

माओवादी केन्द्रकी प्रवक्ता पम्फा भुसालले पनि सरकार गठनलगत्तै पार्टी एकताको प्रक्रिया सुरू हुने दाबी गरिन् ।

बाह्रखरीसँगको टेलिफोन सम्वादमा उनले समानुपातिकतर्फको मतगणना सकिएपछि सांसद सिफारिस र सरकार गठन प्रक्रिया सुरू हुने जानकारी दिइन् । उनले पार्टी एकता हठात र एकैदिनमा नहुने बताउँदै राष्ट्रपति, उपराष्ट्रपति तथा सभामुखको निर्वाचन सरकार गठनपछि सुरू हुने दाबी गरिन् ।

दुई पार्टीको बीचमा एकताको विषयमा कुनै द्विविधा, अस्पष्टता नरहेको बताउँदै भुसालले पार्टी एकताबारे शंका नगर्न आग्रहसमेत गरिन् । उनले हरेक निर्णय पार्टी एकता संयोजन समितिले गर्ने बताउँदै दुवै पार्टीको काम त्यही एकता संयोजन समितिले टुंग्याउने दाबीसमेत गरिन् ।

‘अपेक्षा गरेका दुई–चार ठाउँ जितिएन’ 

प्रवक्ता भुसालका अनुसार केही ठाउँ माओवादी केन्द्रले जित्ने सूचीमा राखेको थियो । तर, परिणाम पार्टीको पक्षमा नआउनु अनपेक्षित भएको उनले बताइन् । “काठमाडौं–६, १०, सप्तरी, गोरखा– २ माओवादीले जित्ने सुनिश्चित भएको मानेको थियो, तर परिणाम त्यस्तो आएन,” उनले भनिन् ।

काठमाडौं–६ मा झक्कु सुवेदी, १० मा हितमान शाक्य र गोरखा–२ मा नारायणकाजी श्रेष्ठ माओवादी केन्द्रका तर्फबाट उमेदवार थिए ।