काठमाडौं । भारतको राजस्थानमा भएको बस दुर्घटनामा १२ जनाको मृत्यु भएको छ । कल्भर्टमा ठोक्किँदा भएको बस दुर्घटनामा अन्य ३० जना घाइते भएका छन् । उनीहरूमध्ये केहीको अवस्था गम्भीर रहेको प्रहरीले जनाएको छ ।

राजस्थानको राजधानी जयपुरबाट १४७ किलोमिटर उत्तरपश्चिममा रहेको सिकर जिल्लाको लक्ष्मणगढमा दुर्घटना भएको हो । प्रहरीका अनुसार यात्रुले भरिएको निजी बस सालासरबाट नवलगढ जाँदै गर्दा दुर्घटना भएको हो ।

“केही घाइतेहरूलाई जयपुरमा रिफर गरिएको र बाँकीको एसके अस्पताल सिकरमा उपचार भइरहेको छ,”वरिष्ठ प्रहरी अधिकारी सत्येन्द्र चौधरीले भने ।

दुर्घटनालगत्तै स्थानीयले प्रहरीलाई खबर गरेपछि उद्धार टोली र एम्बुलेन्स घटनास्थलमा पुगेर घाइतेलाई अस्पताल पुर्‍याइएको थियो ।

भारतमा सडक दुर्घटना सामान्य मानिन्छ । ओभरलोडिङ, खराब सडक र लापरबाह ड्राइभिङका कारण दुर्घटना हुने गर्छ । रासस/सिन्ह्वा