काठमाडौं । चलचित्र ‘पूर्णबहादुरको सारङ्गी’को नयाँ गीत सार्वजनिक भएको छ । निर्माणपक्षले आज युट्युब च्यानलमार्फत ‘रैया चाँदीको’ बोलको गीत सार्वजनिक गरेको हो ।

यो दोहोरी गीतलाई दोहोरी ब्याटल भनिएको छ । ब्याटलमा महिला र पुरुषका दुई टिम छन् । ब्याटल महिलाले राखेको सर्तसहित सुरु हुन्छ । सर्त हुन्छ– महिला टिमले जिते जन्जना बराइलीको घरमा विजय बराल हली बस्नुपर्ने पुरुष टिमले जिते विजयसँग अञ्जनाले बिहे गर्नुपर्ने । 

सर्तमा मञ्जुर भएपछि सुरु हुने दोहोरी ब्याटलमा प्रेम आकर्षण, विवाह र घरजमका कुरा समेटिएको छ । रोधी बस्दा युवायुवतीबीच हुने घोचपेच र रमाइला सवालजवाफ सुन्न सकिन्छ । 

ब्याटलमा महिलापक्षले हारेपछि सर्तमा मञ्जुर भएको गीत र यसको भिडियोमा देखिन्छ ।  

गीतमा आशिष अभिरल र मेलिना राइको स्वर छ ।  नवराज पन्तको शब्दरचना रहेको गीतमा आशिष स्वयंको संगीत छ । 

भिडियोमा सिनेमाका मुख्य कलाकार विजय बराल, मुकुन भुसाल, बुद्धि तामाङ, अञ्जना बराइलीलगायत छन् । 

सरोज पौडेलको कथा तथा निर्देशन रहेको चलचित्रको संवाद महेश दवाडीले लेखेका हुन् । निर्माता बिनोद पौडेल, प्याट्रिक सुवेदी हुन् । कार्यकारी निर्मातामा रमेश चौलागाई, हरि श्रेष्ठ र रमेश ढकाल छन् । 

चलचित्र कात्तिक १५ गते रिलिज हुँदै छ ।