जेरुसेलम । गाजाको एक विद्यालयमा बिहीबार गरिएको हवाई आक्रमणमा कम्तीमा २८ जनाको मृत्यु भएको प्यालेस्टाइनी रेड क्रिसेन्टले जनाएको छ । इजरायली सेनाले भने हमासको कमान्ड केन्द्रमा आक्रमण गरिएको जनाएको छ ।

“प्यालेस्टाइनी रेड क्रिसेन्ट टोलीहरूले इजरायली कब्जामा रहेको दीर अल–बलाहको रफिदा विद्यालयलाई सेनाले लक्षित गर्दा २८ मृतक र ५४ घाइतेलाई सहयोग गरेका छन्,” संस्थाले भनेको छ ।

गाजाको हमास नियन्त्रित स्वास्थ्य मन्त्रालयले वक्तव्यमा समान मृत्यु संख्या उपलब्ध गराएको छ ।

‘रफिदा विद्यालयका रूपमा पहिले प्रयोग भएको परिसरभित्र रहेको कमान्ड–एन्ड कन्ट्रोल केन्द्रबाट’ सञ्चालन गरिरहेका प्यालेस्टाइनी लडाकुलाई आक्रमणले लक्षित गरेको इजरायली सेनाले एक वक्तव्यमा जनाएको छ ।

सेनाले मृतकको संख्या उपलब्ध नगराए पनि कमान्ड–एन्ड–कन्ट्रोल केन्द्र ‘आईडीएफ (सेना) सैनिक र इजरायल राज्यविरुद्ध आतंकवादी आक्रमणको योजना बनाउन र कार्यान्वयन गर्न’ प्रयोग गरिरहेको जनाएको छ ।

बिहीबारको आक्रमण गाजामा विस्थापित प्यालेस्टाइनीलाई आश्रय दिइरहेका विद्यालय भवनहरूमा गरिएको इजरायली हमलाको शृंखलामा पछिल्लो थियो । गाजामा एक वर्षभन्दा बढी समयदेखि लडाइँ जारी छ ।

गाजा नागरिक सुरक्षा एजेन्सीका अनुसार, सेप्टेम्बर २६ मा उत्तरी गाजाको जबालिया शिविरमा अर्को विद्यालय–बनेको आश्रयस्थलमा गरिएको आक्रमणमा कम्तीमा १५ जनाको मृत्यु भएको थियो । इजरायली सेना हाल जबालियामा गहन अभियानमा संलग्न छ ।

इजरायली सेनाले हमासलाई हजारौँ गाजावासीले आश्रय लिएका विद्यालय भवनहरूमा लुकेको आरोप लगाएको छ । उक्त आरोपलाई हमासले अस्वीकार गरेको छ । रासस/एएफपी