काठमाडौं । परराष्ट्रमन्त्री डा. आरजु राणा देउवाले इजरायल र लेबनानमा रहेका नेपालीको अवस्थाका बारेमा जानकारी लिएर ‘अपडेट’ भइरहन त्यहाँस्थित नेपली दूतावासलाई निर्देशन दिएकी छन् । ती देशमा रहेका नेपाली राजदूतहरूसँग आइतबार मन्त्रालयबाट भर्चुअल बैठक गरी उनले इजरायल र लेबनानमा विकसित पछिल्लो परिस्थितिका बारेमा जानकारी लिएकी हुन् ।

बैठकमा मन्त्री राणाले पछिल्लो समयमा विशेष गरी लेबनानमा विकसित परिस्थितिका कारण त्यहाँ रहेका नेपालीको अवस्थाबारे नेपालमा चिन्ता बढिरहेकाले उनीहरू र उनीहरूका परिवारको सम्पर्कमा रहेर आवश्यक सहयोग गर्न निर्देशन दिइन् । बैठकमा मन्त्री राणाले भनिन्, “कुनै पनि प्रकारले त्यहाँ रहेका सबै नेपालीहरूको सम्पर्कमा पुग्ने प्रयास गर्नू । कोही तत्कालै स्वदेश फर्कनका लागि सहयोग चाहनुहुन्छ भने त्यसका लागि समन्वय गर्नू र यदि त्यहाँबाट नेपाली नागरिकको उद्धार गरेर स्वदेश ल्याउनुपर्ने अवस्था आउन सक्छ भने त्यसका लागि पनि आवश्यक गृहकार्य गर्नू ।”

मन्त्री राणाले सम्बन्धित देशका दूतावासलाई सूचना जारी गरी सम्पर्क व्यक्ति तोक्न र आवश्यकताअनुसारका हेल्पडेस्क स्थापना गरेर समस्यामा परेका नेपालीलाई सहायता र समन्वय प्रदान गर्न समेत निर्देशन दिएकी छन् ।

इजिप्टका निम्ति नेपाली राजदूत सुशील लम्सालले लेबनानको पछिल्लो अवस्थाका बारेमा जानकारी गराए । त्यहाँ रहेका नेपालीलाई अहिले नै त्यस्तो कुनै समस्या नरहेको उनले उल्लेख गरे ।

त्यहाँ हाल करिब एक हजार २०० नेपाली रहेका अनुमान गरिएको छ । उनीहरूमध्ये अधिकांश घरायसी काममा रहेको जानकारी राजदूत लम्सालले गराए ।

दूतावासले जारी गरेको सूचनाका आधारमा तीनजना मात्र सम्पर्कमा आएका र उनीहरू पनि बेरुतमा सुरक्षित रहेका समेत उनले जानकारी गराए । हाल कुनै नेपालीले आफूलाई समस्या परेको भनी ‘रिपोर्टिङ’ नगरेको तर नेपालमा रहेका आफन्त बढी चिन्तित भएका उनले बताए ।

यस्तै, इजरायलका निम्ति कार्यवाहक नेपाली राजदूत कुमार श्रेष्ठले इजरायलको अवस्था सामान्य रहेको र त्यहाँ करिब चार हजार ५०० नेपाली सुरक्षित रहेका बताए ।

भर्चुअल बैठकमा पाकिस्तानका निम्ति नेपाली राजदूत तापस अधिकारीले इरानको पछिल्लो अवस्थाका बारेमा जानकारी गराएका परराष्ट्र मन्त्रालयले जनाएको छ ।