काठमाडौं । एभरेस्ट महिला भलिबल लिगमा कर्णाली एसभीएसले लगातार चौथो जित निकालेको छ । बिहीबार त्रिपुरेश्वरस्थित राखेप कभर्डहलमा भएको खेलमा कर्णालीले चितवन शक्तिलाई ३–२ को सेटले पराजित गर्दै अपराजित यात्रा कायम राखेको हो ।

पाँचौँ सेटसम्म गएको खेलमा कर्णालीले पहिलो सेट २५–२० अंकले गुमाएको थियो । त्यसपछि दोस्रो सेट २५–१८ ले आफ्नो पक्षमा पारेको थियो । तेस्रो सेटमा पुनरागमन गर्दै चितवनले २५–२१ ले आफ्नो पक्षमा पार्दा चौथो र पाँचौँ सेटमा भने २५–१५ र १५–१३ अंकले कर्णालीले बाजी मार्‍यो ।

कर्णालीका लागि उत्कृष्ट खेल प्रदर्शन गरेकी मार्की खेलाडी सुमित्रा रेग्मी 'प्लेयर अफ द म्याच' चुनिएकी छन् ।

लिगमा १० अंक जोडेको कर्णाली शीर्ष स्थानमा छ । अब कर्णालीले आफ्नो अन्तिम खेल काठमाडौं स्पाइकर्ससँग खेल्ने छ ।