काठमाडौं । धादिङको झ्याप्लेखोलामा पुरिएको माइक्रो बस बुटवलबाट आएको बताइएको छ ।
लु १ ज ४५७८ नम्बरको माइक्रोबाट १४ जनाको शव निकालिएको काठमाडौं प्रहरी प्रमुख बसन्त रजौरेले जानकारी दिए ।
उनका अनुसार केही साना सवारीसाधन पनि उक्त स्थानमा पुरिएको आशंका गरिएको छ । सशस्त्र प्रहरीका सहायक प्रवक्ता डीएसपी शैलेन्द्र थापाका अनुसार पहिरो बिहान १० बजेतिरै गएको अनुमान गरिएको छ ।
तर धादिङबाट आउने र काठमाडौंबाट जाने सडक पूर्णरुपमा अवरुद्ध भएकाले उक्त स्थानमा पुग्न समय लागेको थियो ।
प्रहरी वृत्त थानकोटका प्रमुख डीएसपी सूर्य सुवेदीका अनुसार एउटै माइक्रोबाट १४ जनाको शव फेला परेको र एकजना हराइरहेका छन् । पहिरो क्षेत्र ठूलो भएकाले पन्छाउने काम नसकिएको उनले जानकारी दिए ।
उक्त क्षेत्रमा बसमा पनि क्षति पुगेको प्रहरीले जानकारी दिएको छ ।