नवलपरासी (सुस्ता) । नारायणी नदि पारि रहेको नेपाली गाउँ सुस्तामा पहिलोपल्ट बिजुली पुगेको छ ।

एक हजार ५ सय ७१ मिटर लामो पूलको निर्माणसँगै नेपाल विद्यूत् प्राधिकरणले ११ केभीको लाइनमार्फत् त्यस क्षेत्रका जनताको घरमा विद्युत् पुर्‍याएको हो ।

अब सुस्ताबासीले एक वर्षसम्म निःशुल्करुपमा बिजुली प्रयोग गर्न पाउनेछन् । पूलसँगै विद्युत् विस्तारको राष्ट्रपति रामचन्द्र पौडेलले बिहीबार भव्य कार्यक्रमसँगै उद्घाटन गरे । उद्घाटन कार्यक्रममा पुगेका नेपाल विद्युत् प्राधिकरणका कार्यकारी निर्देशक कुलमान घिसिङ नेपाल विद्युत् प्राधिकरणको लामोदेखिको प्रयास सफल भएको भन्दै खुसी व्यक्त गरे ।

उनले बाह्रखरीसँगको कुराकानीमा भने, “सुस्ता अब नेपालसँग जोडियो । यो भन्दा खुसीको कुरा हाम्रा लागि के हुन सक्छ ?”

उनले करिब ३५० घरधुरी रहेको बताउँदै सरकारले नै एक वर्षसम्म निःशुल्क बिजुली दिने घोषणा गरेको बताए ।

“पहिला ग्रीडको विद्युत् ल्याउन सकेका थिएनौँ । करिब डेढ किमी नदीमा पोल राख्न सम्भव थिएन । अहिले पूल बनेपछि ११ केभीको लाइन ल्याएर ग्रीडको विद्युत् ल्याएका छौँ,” घिसिङले भने, “नेपालको सिस्टमसँग सुस्ताक्षेत्र जोडियो । यो एउटा ठूलो माइलस्टोन हो । नेपालको हरेक सीमा क्षेत्रमा बिजुली लगेका छौँ तर यो ठाउँ बाँकी थियो । सुस्ताको विद्युतीकरणसँगै नवलपरासी पूर्णरुपमा विद्युतीकरण भयो । अब यहाँ टुरिजम र उद्योग कलकारखाना बन्न सक्छन् । यो खुसीको कुरा हो । पूलको कारणले यो सबै कुरा सम्भव भयो ।”