खोटाङ । अविरल वर्षासँगै आएको बाढी तथा पहिराले खोटाङमा २७ घर बगाएको छ । तीन दिनदेखि लगातार परेको भीषण वर्षाका कारण जिल्लाका विभिन्न ठाउँमा बाढी तथा पहिरोले २७ वटा घर पूर्णरूपमा बगाएको प्रमुख जिल्ला अधिकारी शिवकुमार कार्कीले जानकारी दिए । 

उनले बाढीपहिरोका कारण हालसम्म मानवीय क्षति नभए पनि दुईजना घाइते भएका, आठवटा पशुचौपाया पुरिएका बताए ।

“बाढीपहिराले हालसम्म मानवीय क्षति नभए पनि जिल्लामा ठूलो क्षति गरेको छ । अझै पनि वर्षा भइरहेकाले सतर्कता अपनाउन र बाढीपहिरोबाट विस्थापितको उद्धारमा जिल्लास्थित तीनवटै सुरक्षा निकायका टोली परिचालन गरिएका छन्,” उनले भने ।

पहिरोले घरबारविहीन भएका स्थानीयलाई नजिकको विद्यालय तथा आफन्तकामा सारिएको जनाइएको छ । पहिरोले घर बगाएपछि करोडौँको क्षति बेहोरेका स्थानीय बासिन्दालाई राहत उपलब्ध गराउन सम्बन्धित स्थानीय तहसँग समन्वय गर्ने काम भइरहेको जिल्ला विपद् व्यवस्थापन समितिले जनाएको छ । 

भीषण बाढीका कारण खोटाङ र उदयपुरको सिमानामा पर्ने सुनकोसीस्थित फोक्सिङटार पुल बगाएको छ । पुल बगाएपछि पूर्वी तराईसँगको यातायात सम्पर्क विच्छेद भएको छ । खोटाङको खोटेहाङ गाउँपालिका–९ लिच्कीराम्चे र उदयपुरको रौतामाई गाउँपालिका–५ आँपटार जोड्ने आर्क डिजाइनको मोटरेबल पुलसमेत बगाएपछि यातायात अवरुद्ध भएको हो । 

अविरल वर्षाका कारण जिल्लाका सबै सडक अवरुद्ध भएको जनाइएको छ । मध्यपहाडी लोकमार्गअन्तर्गत दिक्तेल–हलेसी तथा दिक्तेल–चखेवाभञ्ज्याङ सडकका विभिन्न ठाउँमा पहिरो खस्दा सडक पूर्ण रूपमा अवरुद्ध भएपछि यात्रुहरू समस्यामा परेका खोटाङ यातायात प्रालिका महासचिव रामकुमार हिङमाङले जानकारी दिए ।

भीषण बाढीले दूधकोसी तथा सुनकोसी आसपासका स्थानीय बासिन्दा जोखिममा परेका छन् । सुनकोसीमा ४० वर्षयताकै ठूलो बाढी आएको हलेसी तुवाचु नगरपालिका–१ बाहुनीडाँडाका वडाध्यक्ष फौदराज राईले जानकारी दिए । रासस