काठमाडौं । घरेलु टोली भुटानविरुद्ध २–१ को पुनरागमन जित निकाल्दै नेपाली युवा टिम साफ यू–१७ च्याम्पियनसिपको सेमिफाइनलमा प्रवेश गरेको छ ।
थिम्पुस्थित चंलिमिथाङ रंगशालामा बुधबार भएको खेलमा नेपालले पहिलो हाफमा १–० ले पछि परेको स्थिति उल्ट्याउँदै जित निकालेको हो । नेपालको जितमा कृष्णबहादुर आले र सुजन डंगोलले गोल गरे ।
भुटानका योन्टेन थार्चेनले गोल ४३औँ मिनेटमा गोल गरेपछि घरेलु टिमले पहिलो हाफमा १–० को अग्रता बनाएको थियो । तर, ५६औँ मिनेटमा कृष्णको गोलमा नेपाल खेलमा फर्कियो । यस्तै, खेलको निर्धारित समय सकिन पाँच मिनेट बाँकी रहँदा सुजनले निर्णायक गोल गरेपछि नेपाल सेमिफाइनलमा प्रवेश गरेको हो ।
जितसँगै नेपाल समूह 'बी'को उपविजेता बन्दै सेमिफाइनल प्रवेश गरेको हो । नेपालले तीन खेल खेल्दा ६ अंक जोड्यो । यस समूहबाट पाकिस्तान शीर्ष स्थानमा रहँदै सेमिफाइनल पुगेको छ ।
नेपालले अब फाइनल प्रवेशका निम्ति भारतसँग खेल्ने छ । भारत समूह 'ए'को विजेता बन्दै सेमिफाइनल आएको हो ।