काठमाडौं । स्पेनिस ला लिगामा रियाल मड्रिडले डेपोर्टिभो अलाभेसविरुद्ध ३–२ को रोमाञ्चक जित हात निकालेको छ । मंगलबार राति घरेलु मैदान सान्टियागो बर्नबेउमा भएको खेलमा रियाललाई जित दिलाउन लुकास भाज्क्वेज, किलियन एमबाप्पे र रोड्रिगोले गोल गरे । 

खेलको पहिलो मिनेटमै लुकास भास्क्वेजले गोल गर्दै रियाललाई अग्रतामा राखेका थिए । ४०औँ मिनेटमा एम्बाप्पेले गोल गर्दै रियालको अग्रता दोब्बर पारे । 

खेलको ४८औँ मिनेटमा रोड्रिगोले गोल गर्दै रियालको अग्रतालाई ३–० मा पुर्याएका थिए । तर, खेलको अन्त्यतिर पाहुना टिमले दुई गोल फर्काएपछि खेल रोमाञ्चक बनेको हो । ८५औँ मिनेटमा अलाभेसका लागि कार्लोस बेनाभिडेजले गोल गर्दै रियालको अग्रता ३–१ मा झारेका थिए । त्यसको एक मिनेटपछि खेलको ८६औँ मिनेटमा किके गार्सियाले गोल गर्दै खेल ३–२ को स्थितिमा ल्याए पनि टिमको हार टार्न भने सकेनन् । 

जितसँगै रियाल सात खेलबाट १७ अंकका साथ लिगको दोस्रो स्थानमा छ । शीर्ष स्थानको बार्सिलोनाको ६ खेलबाट १८ अंक छ । पराजित अलाभेस भने ७ खेलबाट १० अंकका साथ लिगको आठौँ स्थानमा छ ।