काठमाडौं । नेपाल प्रहरी क्लब स्ट्याग ग्लोबल च्याम्पियन्स टेबलटेनिस लिग सिजन–२ को दोस्रो दिन मंगलबारको राउन्ड रोबिन लिगको खेल सकिँदा शीर्ष स्थानमा उक्लिएको छ । साविक उपविजेता प्रहरीको ३२ अंक छ ।

स्ट्याग च्याम्पियन्स टेबलटेनिस एकेडेमीको आयोजनामा भइरहेको प्रतियोगितामा आयोजक स्ट्याग ३१ अंकसाथ दोस्रो, यल टेबलटेनिस २७ अंकसाथ तेस्रो र रेड टाइल्स १८ अंकसाथ चौथो स्थानमा छन् ।

लैनचौरस्थित राष्ट्रिय टेबलटेनिस प्रशिक्षण केन्द्रमा जारी प्रतियोगितामा होप्स टेबलटेनिस एकेडेमी तथा नेपाल एपीएफ क्लबको समान १५–१५ अंक छ ।

सात टिम सहभागी प्रतियोगितामा ज्ञानभैरव डिल्लीबजार टेबलटेनिस क्लब आठ अंकसहित पुछारमा छ ।