काठमाडौं । राष्ट्रिय महिला लिग–२०२४ मा सर्लाहीको वाग्मती युवा क्लबले संकटा क्लबविरुद्ध ३–१ को जित निकालेको छ ।

मंगलबार सातदोबाटोस्थित एन्फा मुख्यालयमा भएको खेलमा वाग्मतीलाई जित दिलाउन गिफ्टी अचेम्पोङले दुई र पुष्पाकुमारी खड्काले एक गोल गरिन् । संकटाकी तेम्लोपे जेनिफरले एक गोल फर्काए पनि टिमको हार टार्न सकिनन् ।

खेलको चारै गोल दोस्रो हाफमा भएको हो । ६७औँ मिनेटमा अचेम्पोङको गोलमा वाग्मतीले अग्रता बनाएको थियो । ७६औँ मिनेटमा अचेम्पोङले नै वाग्मतीको अग्रता दोब्बर बनाइन् । ८३औँ मिनेटमा जेनिफरले गोल फर्काउँदै संकटाको खेलमा फर्किने सम्भावना कायम राखेकी थिइन् । तर, इन्जुरी समयमा पुष्पाले गोल गरेपछि वाग्मतीले ३–१ को जित पक्का गरेको हो ।

यसअघि, आजै भएको पहिलो खेलमा त्रिभुवन आर्मी क्लबले स्याङजाको वालिङ क्लबविरुद्ध ८–० को फराकिलो जित निकालेको थियो ।