काठमाडौं । चलचित्र ‘कार्साङ्’को फर्स्टलुक पोस्टर सार्वजनिक भएको छ । निर्माणपक्षले आज पोस्टर सार्वजनिक गर्दै रिलिज डेट पनि घोषणा गरेको हो । यो चलचित्र पुस २६ गते रिलिज हुनेछ । 

पोस्टरमा चलचित्रका दुई मुख्य पात्र दयाहाङ राई र सिर्जना निङलेखु छन् । दयाहाङ हिलो लागेको सुरुवाल मात्र लगाएर उभिएका छन् । हिलो सुरुवाल र कमिज नहुनुले उनी कसैसँग भर्खरै झगडा गरेको देखिन्छ । उनको अनुवारमा बदलाको भाव छ । छेउमा उनको श्रीमतीको भूमिकामा रहेकी सिर्जना रोइरहेकी छन् । 

आँगनमा बिर्को खोलिएको ग्यालिनबाट रक्सी पोखिएको छ । दया र सिर्जनाको लुक्स, आगनमा पोखिएको रक्सी र छेउमा तीन चुली ढुंगा लगाएर बालिएको आगोले उनीहरूले रक्सी पार्ने गरेको थप संकेत गर्छ । प्रहरीले अथवा माओवादी द्वन्द्वको समय हो भने तत्कालीन माओवादी कार्यकर्ताले रक्सी पोखिदिएको जस्तो पोस्टरमा देखिन्छ । सोही क्रममा उनीहरूसँग झगडा दयाहाङको झगडा पर्यो । 

यसले उनीहरूको जिविको पार्जनको माध्यम रक्सी बनाएर स्थानीय बजारमा बेच्नु हो भन्ने बुझिन्छ । पृष्ठभूमीमा दुईवटा घर छन् । माथिल्लो लेक वा हिमाली बस्ती हो भन्ने यी घर र पात्रको पहिरनले बताएको छ । घरको माथिल्लो भागमा बाँसमा झुण्डाएको केही झुत्ता मकैले उनीहरूको कमजोर आर्थिक अवस्था संकेत गर्छ । 

माथिल्लो लेक वा हिमाली बस्तीमा दुःख गरेर बस्ने एक परिवारको कथा भन्ने संकेत यो पोस्टरले गरेको निर्माणपक्षले जारी गरेको प्रेस नोटमा उल्लेख छ । 

यम शेर्पा निर्देशित चलचित्रको अघिल्लो हप्ता मात्रै छायांकन सकिएको थियो । सिन्धुपाल्चोक जिल्लाको बाह्रबिसे नगरपालिका, भोटेकोसी गाउँपालिका क्षेत्रमा खिचिएको छ । यार्सा फिल्म्स र पुरुषोत्तम प्रधान फिल्म्सको प्रस्तुतिमा सिनेमा निर्माण गरिएको हो । 

सामाजिक कथावस्तुमा निर्माण भएको चलचित्रमा निर्देशक शेर्पा स्वयंको पटकथा र संवाद छ । चलचित्रमा दयाहाङ र सिर्जनासँगै जितु नेपाल, दीया मास्के, बुद्धि तामाङ, प्रेम लोप्चन, डोमा ह्योल्मो, सृष्टि गौतम, छोकी शेर्पा, सुरवीर पण्डित र कर्मा शेर्पाको अभिनय छ । 

बाल कलाकारमा राशि लिम्बू र सोहन थापाले अभिनय गर्दैछन् । सिनेमालाई पुरुषोत्तम प्रधानले खिचेका हुन् । उनी सिनेमाका निर्माता समेत हुन् । गोविन्द बोहरा सह–निर्माता रहेको सिनेमाका कार्यकारी निर्माता आङछिरिङ शेर्पा हुन् ।