बर्लिन । नाटो प्रमुख जेन्स स्टोल्टेनबर्गले रुसको कुर्कुस क्षेत्रमा गरिएको युक्रेनी आक्रमण युक्रेनको आत्मरक्षाका निम्ति भएको तर्क गरेका छन् । युक्रेनलाई सीमाक्षेत्रमा आक्रमण गर्ने पूर्ण अधिकार रहेको उनले उल्लेख गरेका छन् ।

जर्मन अखबार डी वेल्टसँगको कुराकानीमा उनले युक्रेनलाई अन्तर्राष्ट्रिय कानुनानुसार आफ्नो रक्षा गर्ने अधिकार रहेको बताएका हुन् ।आक्रमणले किभका सहयोगीको पनि ध्यानाकर्षण गरेको उनले उल्लेख गरेका छन् । स्टोल्टेनबर्गले यसमा पश्चिमी सैन्य गठबन्धनले कुनै भूमिका नखेलेको जनाएका छन् ।  

स्टोल्टेनबर्गले युक्रेनलाई युरोपेली सैन्य उपकरणदाता तथा जर्मनीको प्रतिबद्धतालाई स्वागत गरेका छन् । बर्लिनले अर्को वर्षको बजेटमा किभलाई सहयोग गर्ने तयारी गरिरहेको उनले उल्लेख गरेका छन् ।

जर्मनीले युक्रेनलाई आवश्यक सैन्य उपकरण सहयोग निरन्तर जारी राख्ने  निर्णय सार्वजनिक गर्दा चान्सलर ओलाफ स्कोल्जको सरकार गत हप्ता कडा आलोचनामा परेको थियो । रासस/एएफपी