काठमाडौैं । बंगलादेशमा जारी अवस्थाको अनुगमन गर्न भारत सरकारले एक समिति गठन गर्ने निर्णय गरकको छ । यस समितिले बंगलादेशी हिन्दुहरूको सुरक्षा सुनिश्चित गर्न प्रयास गर्ने जनाइएको छ ।

भारतका गृहमन्त्री अमित शाहले ट्विट गर्दै यसबारेमा भनेका छन्, “बंगलादेशमा जारी अवस्थालाई ध्यानमा राख्दै मोदी सरकारले भारत–बंगलादेश सीमा (आईबीबी)मा वर्तमान अवस्थाको निगरानी गर्न एक समिति गठन गरेको छ ।”

गठित समितिले बंगलादेशमा रहेका आफ्ना समकक्षी अधिकारीहरूसँग संवाद गर्ने उनले जनाएका छन् । 

बंगलादेशमा रहेका भारतीय नागरिक, हिन्दु र त्यहाँ बस्ने अन्य अल्पसंख्यक समुदायको सुरक्षा सुनिश्चित गर्नका लागि समितिले काम गर्ने उनले स्पष्ट पारेका छन् । समितिको नेतृत्व एडीजी, सीमा सुरक्षा बल, पूर्वी कमाण्डले गर्ने उनले बताएका छन् । 

शेख हसिनाले बंगलादेश छोडेर भागेपछि सामाजिक सञ्जालमा हिन्दुहरुको सम्पत्ति र मन्दिरमा आक्रमण भएको समाचार आइरहेका छन् ।

यसअघि भारतका विदेशमन्त्री एस जयशंकरले अगष्ट ६ मा भारतको संसदमा बंगलादेशमा रहेका अल्पसंख्यक, हिन्दु र मन्दिरलाई लिएर चिन्ता व्यक्त गरेका थिए ।