न्युयोर्क । संयुक्त राष्ट्रसंघका अधिकारीले नौ महिनादेखि जारी इजरायली आक्रमण सुरु भएदेखि गाजापट्टीको ९० प्रतिशत जनसंख्या कम्तीमा एकपटक विस्थापित भएको पुष्टि गरेका छन् ।

कब्जा गरिएको प्यालेस्टिनी क्षेत्रमा मानवीय मामिला समन्वयका लागि राष्ट्रसंघीय कार्यालय (ओसीएचए)का प्रमुख एन्ड्रिया डे डोमेनिकोले गाजामा जनसंख्या २१ लाख रहेको अनुमान गरिएको पत्रकार सम्मेलनमा बताए । 

यस समयमा, गाजापट्टीमा प्रत्येक दशमध्ये नौजना कम्तीमा एकपटक आन्तरिकरूपमा विस्थापित भएको उनले बताए ।  

उनले सन् २०२३ अक्टोबरदेखि ३७ हजारले ज्यान गुमाएको जानकारी दिए । उनका अनुसार ११ लाख नागरिकले गाजापट्टी छाडेको र उत्तरी गाजामा अझै पनि तीन लाखदेखि तीन लाख ५० हजार मानिस दक्षिणमा सर्न नसक्ने अवस्थामा छ ।

राष्ट्रसंघका अधिकारीले इजरायली कब्जामा रहेका क्षेत्रहरू खाली गर्ने आदेशपछि विगत दुई दिनमा विस्थापित भएका व्यक्तिहरूलाई विस्थापितको संख्यामा जोडिनु आवश्यक नभएको बताएका छन् । उनीहरूमध्ये प्रायः सबै विस्थापितको गणनामा परिसकेका छन् ।

मध्यपूर्वका लागि प्यालेस्टिनी शरणार्थीहरूका लागि संयुक्त राष्ट्रसंघीय राहत र कार्य निकाय (यूएनआरडब्लूए)ले करिब दुई लाख ५० हजार प्यालेस्टिनीे खान युनुसबाट फेरि भाग्न बाध्य हुने अनुमान गरेको छ । रासस/क्यूएनए