काठमाडौं । चन्द्रागिरि नगरपालिकाले नवजात शिशुहरूको १८ वर्षे मुद्दती खाता खोल्ने गरी एनआईसी एसिया बैंकसँग सम्झौता गरेको छ । 

सम्झौतापत्रमा बैंकका सहायक प्रमुख कार्यकारी अधिकृत अर्जुनराज खनिया र चन्द्रागिरि नगरपालिकाका नगर प्रमुख घनश्याम गिरीले हस्ताक्षर गरेका हुन् ।

चन्द्रागिरि नगरपालिकाको निजी उद्यम प्रवर्द्धन, आर्थिक सहायता तथा कार्यक्रम अनुदान सञ्चालन कार्यविधि, २०७८ (संशोधनसहित २०८०) कार्यन्वयनमा ल्याएको छ । उक्त कार्यविधिअनुसार नगरपालिकाभित्र २०८० साउन १ गते वा सो मितिपछि जन्मिएका बालबालिकाहरू १८ वर्ष पुगेपश्चात् परिपक्क हुनेगरी नगरपालिकाबाट यो सुविधा प्रदान गरिने बताइएको छ । 

नगरपालिकाको कार्यविधिअनुसार यस नगरमा स्थायी बसोबास गर्ने अविभावकका छोराछोरीहरू यो योजनाबाट लाभान्वित हुन सक्नेछन् । यसका लागि जन्मदर्ता अनिवार्य गरिएको छ ।

चन्द्रागिरि नगरपालिकाले सो अवधिपछि नगरमा जन्मिएका नवजात शिशुहरूको पाँच–पाँच हजारका दरले प्रत्येक बालबालिकाको नाममा एनआईसी एसिया बैंकमा १८ वर्षे मुद्दती निक्षेप खाता खोलिदिनेछ । यस्ता खातामा अभिभावकले चाहेको खण्डमा थप रकम समेत राख्न सक्ने व्यवस्था गरिएको छ । यस योजनामा सामेल हुने ग्राहकको निक्षेपमा बैंकले अधिकतम ब्याजदर प्रदान गर्नेछ ।

चन्द्रागिरि नगरपालिकामा जन्म लिने बालबालिकाहरू १८ वर्ष पार गर्दै गर्दा उच्च शिक्षा हासिल गर्न अथवा कुनै व्यवसाय सञ्चालन गर्न नगरपालिकाले प्रदान गरेको यस कोषले निकै सहयोगी भूमिका खेल्ने अपेक्षा गरिएको छ ।