काठमाडौं । वर्ष २०८० मा एक लाख १४ हजार विद्यार्थीले वैदेशिक अध्ययन अनुमतिपत्र (एनओसी) लिएका छन् । शिक्षा, विज्ञान तथा प्रविधी मन्त्रालयले सार्वजनिक गरेको तथ्यांकमा २०८० वैशाख १ गतेदेखि ०८० चैत ३० सम्म एकलाख १४ हजार ४२२ जनाले एनओसी लिएको उल्लेख छ ।
 
सबैभन्दा धेरै ३४ हजार ५८ जनाले जापानका लागि एनओसी लिएका छन् । उनीहरूले जापानिज भाषा विषयमा पढ्न जान अनुमति लिएको तथ्यांकमा उल्लेख छ ।
 
विद्यार्थीको दोस्रो रोजाइमा क्यानडा छ । सो अवधिमा क्यानडा जान २१ हजार ३०९ विद्यार्थीले एनओसी लिएका छन् । तेस्रोमा अष्ट्रेलिया छ, उक्त मुलुकका निम्ति १८ हजार ७७९ वटा एनओसी जारी भएको छ ।
 
युकेका लागि १२ हजार २८२, अमेरिकाका निम्ति ८ हजार २५०, कोरियाका निम्ति ४ हजार ८८७, भारतका लागि २ हजार ३७२ र यूएईका लागि २ हजार ३१३ एनओसी जारी भएका छन् । 

यी बाहेक अन्य मुलुक जान एनओसी लिनेको संख्या दुई हजारभन्दा कम छ । 

सबैभन्दा धेरै ३३ हजार १६१ वटा एनओसी जापनिज भाषा विषयका लागि जारी भएका छन् । म्यानेज्मेन्टमा २८ हजार ६९१, बिजनेसमा ११ हजार ३१५ तथा आईटीमा ६ हजार ८०३ एनओसी जारी भएका छन् ।
 
साइन्समा ४ हजार ८७१, हेल्थमा ४ हजार ७५४, इन्जिनियरिङमा ४ हजार २७२, कम्प्युटर साइन्समा ४ हजार २८३ तथा साइन्स एण्ड टेक्नोलोजीमा ४ हजार १५८, हस्पिटालिटीमा ३ हजार १६, आट्र्समा एक हजार ९८० वटा एनओसी जारी भएको तथ्यांक छ ।
 
यी बाहेकका विषय पढ्न एनओसी लिनेको संख्या एक हजारभन्दा कम छ ।