काठमाडौं । राष्ट्रिय स्वतन्त्र पार्टी (रास्वपा)का महामन्त्री मुकुल ढकालले मंगलबारको सचिवालय बैठक बमोजिम समीक्षा प्रतिवेदनका आधारमा प्रस्ताव तयार पारे पनि आफूलाई जारी केन्द्रीय समिति बैठकमा प्रस्ताव प्रस्तुत गर्न नदिइएको बताएका छन् । उनले समीक्षा प्रतिवेदन पछिका सन्दर्भमा आफ्ना भनाइ राख्ने अनुमति दिने सचिवालयले निर्णय गरे पनि केन्द्रीय समिति बैठकमा आफूलाई लिखित रूपमा तयार पारिएको प्रस्ताव र भनाइ पनि सभापतिले राख्न अनुमति नदिएको बताएका छन् । 

लिखित रूपमा सभापति रवि लामिछानेलाई सम्बोधन गर्दै आफूले बढी बोले भाइ सम्झेर माफ गर्न आग्रह गरेका उनले दाजु र भाइका कुराभन्दा पनि पार्टी र देशको कुरा महत्वपूर्ण रहेको बताए । 

“प्रिय सभापति, रवि सर, आज केन्द्रीय समिति सदस्यज्यूहरू र आम जनतालाई साक्षी राखेर केही भन्न चाहन्छु,” उनले भनेका छन्, “बढी बोले भने, भाइ सम्झेर माफ गरिदिनु हुन अनुरोध गर्दछु । तर, आज बोल्नै पर्ने स्थिति आयो । यहाँ दाजु र भाइका कुराभन्दा पनि पार्टीको कुरा आयो, देशको कुरा आयो, सत्यको कुरा आयो ।”

उनले पौराणिक कथाको प्रसंग उठाउँदै पार्टीमा पनि गणेश प्रवृत्ति हावी भएको उल्लेख गरेका छन् । उनले सभापतिलाई पनि गणेश प्रवृत्तिनै मन परेको भन्दै आफू भने कार्तिकेयकै भूमिकामा रहने बताएका छन् । 

“म देश घुम्न चाहन्छु, सभापतिज्यू, म जनतासँग बस्न चाहन्छु । म कार्तिकेय बन्छु तर गणेश बन्दिनँ । तपाईंको इच्छा, गणेशलाई पहिलो मान्नु हुन्छ वा कार्तिकेयलाई ?,” प्रश्न गर्दै उनले भनेका छन् । 

महामन्त्री ढकालले सभापतिले बोलेका विषयहरूको अभिलेख राख्न पार्टीमा उपसमिति गठनको प्रस्ताव गरेका छन् । 

“तपाईंले बोलेका सबैको कुराको रेकर्ड राखेर उत्तर दिन पर्यो । राजनीतिमा आएपछि बोलेका सबै कुराहरू यही केन्द्रीय समितिबाट एउटा उपसमिति बनाऔं, ती बोलिको अभिलेखिकरणका लागि,” उनले भने, “अरूले बोलेका कुराहरू मलाई मतलब छैन । मलाई तपाईंले बोलेका कुराहरू मतलब छन् । हिजो किन बोल्नु भयो ? बोलेका कुराहरू कहिले पूरा गर्नुहुन्छ, तालिका चाहियो । रिजल्ट चाहियो ।”

उनले अबका दिनमा काम गरेपछि मात्र बोल्न अुनरोध गरेका छन् ।