काठमाडौं । नेपाल सरकारले सार्वभौम राष्ट्रमाथि रुसले आक्रमण गरेको भन्दै युक्रेनको पक्ष लिँदै आएको छ, तर सत्तारुढ दल नेकपा (एकीकृत समाजवादी) भने रुसको पक्षमा उभिएको छ । 

नेपाली नागरिकलाई अवैध तरिकाले आफ्नो सेनामा भर्ती गरी युक्रेनसँगको युद्धमा पठाइरहेको रुसको पक्षमा एकीकृत समाजवादी उभिएको हो ।

नेपालले बारम्बार नेपालीलाई सेनामा भर्ती नगर्न र भर्ती भएकालाई फिर्ता पठाउन गरिरहेको अनुरोध बेवास्ता गर्दै आएको रुसका कारण युक्रेनसँगको युद्धमा ४४ जनाभन्दा बढी नेपालीले ज्यान गुमाइसकेका छन् ।

यस्तो, अवस्थामा एकीकृत समाजवादीले अमेरिकालगायत पश्चिमी राष्ट्रहरूको विरोध गर्दै रुसको समर्थन गरेको हो ।

राजधानी काठमाडौंमा चलिरहेको एकीकृत समाजवादीको १० औं राष्ट्रिय महाधिवेशनमा अध्यक्ष माधवकुमार नेपालले प्रस्तुत गरेको राजनीतिक प्रतिवेदनमा रुस, चीन र प्यालेस्टिनको पक्ष लिइएको छ ।

“सोभियत सङ्घको विघटनपछि केही पश्चिमी मुलुकहरूले रुसलाई अपमानित गर्दै र घेर्दै युक्रेन र रुसलाई युद्धमा धकेलेका छन्,” प्रतिवेदनमा भनिएको छ, “नाटोका सदस्य राष्ट्रको संख्या र प्रभाव विस्तार गर्दै सामरिक क्षमता बढाउने ध्याउन्नमा उनीहरूले युक्रेनलाई मोहोरा बनाएर युद्धमा धकेले ।”

पश्चिमी राष्ट्रहरूले रुसलाई घेर्ने र कमजोर बनाउने उद्देश्यले युक्रेनलाई नाटोको सदस्य बन्न दबाब दिइरहेको प्रतिवेदनमा जनाइएको छ । युक्रेनको सार्वभौम सत्ताको बहानामा अत्याधुनिक शस्त्रास्त्र युक्रेन पठाएर युद्धलाई अझ लम्ब्याउने प्रयास अमेरिकालगायत पश्चिमी राष्ट्रले गरेको आरोप लगाइएको छ ।

“यसबाट यूरोपमा मात्रै होइन विश्वभरि युद्धजनित प्रभाव पर्दै गएको छ । विश्वशान्ति र आर्थिक विकासमा बाधा पुग्ने, खाद्यान्नको अभाव, महंगी, विश्व व्यापारमा गिरावट, इन्धनको मुल्यमा वृद्धि, रोजगारीमा गिरावट मात्रै होइन विश्वव्यापी आर्थिक मन्दीको सङ्कट आउने सम्भावना बढ्दै छ । युद्ध लम्बिँदै जादा आणविक युद्धको खतरा बढ्दैगएको छ,” प्रतिवेदनमा उल्लेख गरिएको छ ।

रुसी सेनामा नेपालीको भर्ती गरेको सन्दर्भ प्रतिवेदनमा उठाइएको छ । तर, रुसले अन्तर्राष्ट्रिय कानूनविपरीत अवैध तरिकाले नेपालीलाई आफ्नो सेनामा भर्ती गरेको विषयको विरोध गरिएको छैन । एकीकृत समाजवादीले रुसले नेपालीलाई आफ्नो सेनामा भर्ती गर्न हुँदैन र पाउँदैन भनेर स्पष्ट अडान लिएको छैन ।

“रोजगारीका नाममा अन्तर्राष्ट्रिय मानव तस्करको चङ्गुलमा पारेर विना तालिम भाडाका सिपाहीसरह अवैध बाटोबाट युद्धमा पठाउने गरिएको छ । स्थल सेनाको मोहरामा पठाइने यस्ता जवानहरू अत्यधिक रूपमा मारिने र अङ्गभङ्ग हुने गरेका छन् । नेपालबाट गएका कैयन होनाहार युवाहरूको मृत्यु भएको छ भने कैयन घाइते एवं बेपत्ता भएका छन् । नेपाली युवालाई रुसी सेनामा भर्ती गर्ने कार्य रोकिनु पर्छ” प्रतिवेदनमा भनिएको छ ।

प्रतिवेदनमा रुसी सेनामा नेपाली युवाको भर्ती रोक्न, मानव तस्करी गरी नेपाली युवालाई रुसी सेनामा भर्ती गर्न लैजाने दलालहरूलाई कारबाही गर्न, रुसी सेनामा गएका युवालाई उद्धार गरी सकुशल स्वदेश फिर्ता गर्न र मृतक एवं घाइतेलाई क्षतिपूर्ति दिलाउन सरकारले प्रभावकारी कूटनीतिक पहल गर्नुपर्ने औंल्याइएको छ ।

प्रतिवेदनमा चीनको प्रशंसा र अमेरिकालगायत पश्चिमी राष्ट्रहरूको आलोचनामा धेरै शब्द खर्चिएको छ । 

आर्थिक, प्राविधिक तथा वैज्ञानिक क्षेत्रमा चीनले गरेको योजनाबद्ध विकास र अन्तर्राष्ट्रिय सहयोगले विश्वका कैयौं मुलुकहरूका लागि नयाँ सम्भावनाका ढोका खुल्दै गएको दाबी प्रतिवेदनमा एकीकृत समाजवादीका अध्यक्ष माधवकुमार नेपालले गरेका छन् ।

“एक शक्ति राष्ट्रका रूपमा चीनको उदयले पश्चिमी मुलुकहरूको प्रभुत्व कमजोर हुन थालेको छ र साम्राज्यवाद हडबडाएको छ । चीनको थप विकासलाई रोक्न त्यसले इण्डो–प्यासिफिक रणनीति (आइपीएस), क्वाड, युकेएएस जस्ता गठबन्धन बनाएको छ,” प्रतिवेदनमा नेपालले भनेका छन् ।

अमेरिकालगायत पश्चिमी राष्ट्रहरूले ताइवानमा तनाव बढाउँदै गरेको निष्कर्ष अध्यक्ष नेपालको छ । भारतलगायत यस क्षेत्रका अन्य देशहरूलाई नजिक्याउँदै जसरी हुन्छ चीनको विकासलाई रोक्ने प्रयासमा उनीहरू रहेको उनले जनाएका छन् ।

साम्राज्यवादी तथा पूँजीवादी शक्ति राष्ट्रको हस्तक्षेपकारी कार्यका बाबजुद चीनले समाजवाद निर्माणको कार्यदिशालाई अनवरत रूपमा अगाडि बढाइरहेको विश्वास अध्यक्ष नेपालको छ । “राष्ट्रपति सी चिनफिङको नेतृत्वमा चीनले अर्थव्यवस्थालाई अझ बढी उत्पादक तथा जनमुखी बनाउन प्रयन्त गरिरहेको छ । विकासशील राष्ट्रहरूसँग बहुपक्षीय र दुई पक्षीय सहयोग अभिवृद्धि गर्दै चीनले विश्व शक्ति सन्तुलनमा नयाँ गति दिन प्रयत्न गरिरहेको छ,” प्रतिवेदनमा अध्यक्ष नेपालले चीनको प्रशंषा गरेका छन् ।

चीनको विकासको असर अमेरिकी अर्थतन्त्रमा पर्न थालेको र अमेरिकी बजारमा चीनिया वस्तुको आपूर्ति बढ्दै जाँदा चीन–अमेरिका व्यापारमा अमेरिकाले ठूलो व्यापार घाटा व्यहोर्नु परेको दाबी प्रतिवेदनमा गरिएको छ ।

वित्तीय क्षेत्रमा समेत चीनको प्रभाव बढ्न थालेको र त्यसले गर्दा अमेरिकाले चीनमाथि विभिन्न प्रकारका प्रतिबन्ध लगाउन र अवरोध खडागर्न थालेको ठहर अध्यक्ष नेपालको छ ।

प्रतिवेदनमा अध्यक्ष नेपालले भनेका छन्, “चीनको आधुनिकीकरण र शैन्य तथा सामरिक क्षेत्रमा भएको विकासले गर्दा अमेरिका र चीनबिचको सम्बन्ध चिसिदैछ । अमेरिकाले चीनसँगको सम्बन्धलाई शीत युद्धतर्पm धकेल्न थालेको छ ।”

इजरायलले पश्चिमी शक्ति सम्पन्न राष्ट्रहरूको आडमा प्यालेस्टिन भूमिमाथि बारम्बार अतिक्रमण गर्दै आएको प्रतिवेदनमा उल्लेख गरिएको छ । इजरायलको यस्तो कार्यका कारण प्यालेस्टिन भूमि लामो समयदेखि तनावग्रस्त रहेको जनाइएको छ ।

“केही समय अघि इजरायलले प्यालेस्टिनी भूभाग गाजामा बर्बतापूर्वक हमला गरेको गियो । हमासको प्रतिकार गर्ने बहानामा गरिएको उक्त आक्रमणमा परी ३५ हजारभन्दा बढी मानिस मारिएका छन् भने विसौँ हजार मानिस बेपत्ता भएका छन्,” प्रतिवेदनमा भनिएको छ ।

प्यालेस्टिन ध्वस्त भइरहँदा पश्चिमा शक्तिहरू तमासा हेरिरहेको आरोप प्रतिवेदनमा लगाइएको छ । संयुक्त राष्ट्र सङ्घले पारित प्रस्तावहरू लागू गर्न नसकेको र मानवीय सहायताहरूको ढुवानी र वितरणमा अवरोध भइरहेको पनि प्रतिवेदनमा उल्लेख छ ।

इजरायली अतिक्रमण, नाकाबन्दी र हस्तक्षेपका विरुद्ध प्यालेस्टिनी जनताले विभिन्न समयमा प्रतिकार र प्रत्याक्रमण गर्दै आएको पनि जनाइएको छ ।

हमासले केही समयअघि इजरायलका विरुद्ध गरेको आक्रमणमा परी सयौँ इजरायली मारिएका थिए भने केहीलाई बन्दी बनाइएको थियो । उक्त घटनामा परी दशजना नेपाली विद्यार्थीको पनि ज्यान गएको थियो र एकजना विपिन जोशीलाई बन्धक बनाएको थियो तर प्रतिवेदनमा नेपाली मारिएको उक्त घटनाको कुनै निन्दा वा भ्रत्सना गरिएको छैन ।