![गृहमन्त्री लामिछानेबारे आईजीपी कुँवरको अभिव्यक्तिमा सांसदले उठाए प्रश्न](https://12khari.top/uploads/posts/Basant-Kunwar-1720177011.jpg)
काठमाडौं । प्रहरी महानिरीक्षक (आईजीपी) वसन्त कुँवरले सहकारी ठगी प्रकरणमा गृहमन्त्री रवि लामिछानेको संलग्नता नभेटिएको भनेर दिएको अभिव्यक्तिबारे संसदीय छानबिन समितिमा प्रश्न उठेको छ ।
शुक्रबार समितिको बैठकमा सांसद ईश्वरी न्यौपानेले राज्य व्यवस्था समितिमा महानिरीक्षक कुँवरले दिएको अभिव्यक्तिलाई लिएर प्रश्न गरेकी हुन् ।
समितिले आजको बैठकमा आईजीपी कुँवरसहितलाई छलफलमा बोलाएको थियो ।
बैठकमा सहभागी एक सांसदका अनुसार सांसद न्यौपानेले एकै प्रकारको आरोपमा राष्ट्रिय प्रजातन्त्र पार्टी (राप्रपा)की सांसद गीता बस्नेतलाई पक्राउ गरिएको तर गृहमन्त्रीलाई छाडिएको भन्दै आईजीपी कुँवरलाई प्रश्न गरेकी थिइन् ।
आईजीपी कुवँरले सुरुमै सुप्रिमलगायत सहकारीको अनुसन्धान भइरहेको जानकारी गराएका थिए । त्यसपछि सांसद न्यौपानेले 'दबाबमा परेर राज्य व्यवस्था समितिमा भिव्यक्ति दिनुभएको हो ?' भनेर प्रश्न गरेकी थिइन् । उनले पोखरा महानगरको प्रतिवेदनमा गृहमन्त्रीको नाम उल्लेख भएको विषय पनि उठाएकी थिइन् ।
![Global Ime bank](https://baahrakhari.com/uploads/bigyaapan/30885600.gif)
आईजीपी कुँवरले जवाफ दिँदै भनेका थिए, “हामी छानबिनमा छौँ । छानबिन भइरहेको छ ।”
ती सांसदका अनुसार पूरक प्रश्न सोध्दा पनि कुवँरले छानबिन भइरहेको बताएका थिए । सांसद न्यौपानेले सांसद बस्नेतको प्रसंग निकाल्दै उस्तै प्रकृतिको विषयमा लामिछानेलाई किन उन्मुक्ति भन्ने पूरक प्रश्न गरेकी थिइन् ।
तर, कुँवर आफ्नो २ बजे अन्यत्र बैठक भएको भन्दै यो विषय अनुसन्धानमा रहेको जवाफ दिएको ती सांसले बताए ।
“जवाफमा स्किप गर्दै आयो । अनुसन्धानमा रहेको उहाँले ईश्वरी माननीयज्यूको प्रश्नमा जवाफ दिइरहनुभयो,” उनले भने ।
अर्का एक सांसदले दिएको जानकारी अनुसार कुँवरले आफूले सूचनाको आधारमा बोल्ने भन्दै आजको दिनमा पनि नयाँ विषय केही नभएको बताएका थिए ।
“विषय अनुसन्धानको क्रममा छ । अभियोजनको अवस्थामा पुगेको छैन,” कुँवरको भनाइ उद्धृत गर्दै ती सांसदले भने ।
०८० चैत २० गते राज्य व्यवस्था समितिको बैठकमा आईजीपी कुवँरले गृहमन्त्री लामिछानेविरुद्ध उजुरी नपरेको अभिव्यक्ति दिएका थिए ।
आईजीपी कुँवरले राज्य व्यवस्था समितिमा 'ठाडो उजुरीको रूपमा जो इस्यू आयो, दर्ता भएको छ । तर अनुसन्धान गर्दा तथ्य प्रमाण भेटिएन । कानुनको दायरामा पनि पर्ने अवस्था आएन,” गृहमन्त्रीतर्फ हेर्दै भनेका थिए, “अहिले सांकेतिकरूपमा रवि लामिछाने भन्ने भएको छ । त्यो विषयमा अहिलेसम्मको तथ्य प्रमाणका आधारमा कुनै पनि आधार देखिँदैन ।”