![क्याम्पस प्रमुख कुशवाहाको हत्यामा प्रयोग भएको पेस्तोलसहित थप एक जना पक्राउ](https://12khari.top/uploads/posts/pakrau5-1715573874.jpg)
बारा । रामराजामोहन विक्रम क्याम्पसका तत्कालीन प्रमुख हरिभूषण कुशवाहाको हत्यामा प्रयोग भएको पेस्तोल तथा खरखजानासहित थप एक जनालाई बारा प्रहरीले पक्राउ गरेको छ ।
बारागढी गाउँपालिका–५ स्थित चरमन्तपथरा बस्ने ४२ वर्षीय हरिन्दर महरा चमारलाई पक्राउ गरिएको जिल्ला प्रहरी कार्यालय बाराका प्रहरी प्रवक्ता प्रहरी नायब उपरीक्षक दधीराम न्यौपानेले जानकारी दिए ।
उनको साथबाट प्रहरीले एउटा कटुवा पेस्तोल, अमेरिकामा बनेको अटोमेटिक पेस्तोल, उक्त पेस्तोलमा लाग्ने एक राउन्ड गोली र म्याग्निज एक थान बरामद गरेको प्रहरीले जनाएको छ ।
कुशवाहाको आदर्श कोतवाल गाँउपालिका–३ बतरा र भटिनियाको बीचमा पर्ने मन्दिर अगाडि गत जेठ ३२ गते हत्या भएको थियो । प्रहरीले घटनामा संलग्न रहेको आशंकामा सात जनालाई पक्राउ गरिसकेको छ ।
![Global Ime bank](https://baahrakhari.com/uploads/bigyaapan/30885600.gif)
तर, हत्याका मुख्य आरोपित अझै फरार छन् । उनलाई पक्राउ गर्न प्रहरीले भारतका सुरक्षा अधिकारीसँग निरन्तर सम्पर्कमा रहेर खोजतलास गरिरहेको प्रवक्ता न्यौपानेले बताए ।
गोली हान्ने मुख्य दोषी पक्राउ गर्न नागरिक अगुवा, क्याम्पस व्यवस्थापन समिति, कर्मचारी, राजनीतिकर्मी र विद्यार्थीले दबाब दिँदै आएका छन् ।
बारामा आठ महिना अवधिमा चार जनाको गोली हानी हत्या भएको छ । रासस