काठमाडौं । क्रसर तथा खानी उद्योग व्यवसायीहरूले गरिरहेको आन्दोलन स्थगित भएको छ । बिहीबार सरकारसँग तीनबुँदे सहमति भएसँगै लामो समयदेखि उद्योग नवीकरणको माग राख्दै आएका क्रसर तथा खानी उद्योग व्यवसायीहरूले आन्दोलन स्थगित गरेका हुन् ।

सहमतिपत्रमा संसदीय समितिमा दफावार छलफलमा रहेको निर्माणमुखी सामग्री (व्यवस्थापन तथा नियमन) विधेयक, २०८० विधेयक पारित भएपछि क्रसर उद्योगको नवीकरणसम्बन्धी समस्या सम्बोधन हुने उल्लेख गरिएको छ । विधेयक छिटो पारित गराउन आआफ्नो तर्फबाट भूमिका निर्वाह गर्ने सहमति भएको छ ।

त्यसैगरी, नवीकरण छुट भएका उद्योग नवीकरणका लागि आवश्यक व्यवस्था गर्ने सहमति भएको छ । यस सम्बन्धमा २०७९ माघ ११ गतेको मन्त्रिपरिषद्को निर्णय र सर्वोच्च अदालतको आदेशको सम्मान गर्दै मन्त्रिपरिषद्को निर्णय कार्यान्वयन गर्न समन्वयात्मक भूमिका निर्वाह गर्ने सहमतिपत्रमा उल्लेख छ ।

सहमती पत्रमा संघीय मामिला तथा सामान्य प्रशासन मन्त्रालयको तर्फबाट सहसचिव डा. नारायण प्रसाद रेग्मी र नेपाल क्रसर तथा खानी उद्योग व्यवसायी महासंघको तर्फबाट अध्यक्ष सीताराम न्यौपानेले हस्ताक्षर गरेका छन् ।