काठमाडौं । प्रमुख प्रतिपक्षी दल नेपाली कांग्रेसले चिनियाँ अन्तर्राष्ट्रिय परियोजना (बीआरआई)प्रति सकारात्मक रहेको तर ऋण धान्न सक्ने परिस्थिति नभएको निष्कर्ष निकालेको छ ।

सोमबार पार्टी सभापति शेरबहादुर देउवाको निजी निवास बूढानीलकण्ठमा बसेको पदाधिकारी र पूर्वपदाधिकारीहरूको बैठकले मन्त्रिपरिषद्ले बीआरआईको विषयमा छलफल अघि बढाएको भन्दै थप ऋण राष्ट्रले धान्न नसक्ने निष्कर्ष निकालेको हो ।

“बीआरआईका सन्दर्भमा सरकारले गृहकार्य गरिरहेको, चीन सरकारका उपविदेशमन्त्री आएको, मन्त्रिपरिषद्‌मा छलफल चलेको विषयमा पदाधिकारी र पूर्वपदाधिकारी बैठकमा छलफल भएको छ,” नेपाली कांग्रेसका प्रवक्ता डा. प्रकाशशरण महतले भने, “यो बैठकले के निष्कर्ष निकालेको छ भने हाम्रो धेरै ठूलो ऋणको बोझ भइसक्यो । अझै ऋण बढाउँदै लैजान हुँदैन । धेरै अनुदान कार्यान्वयन नभएको अवस्थामा अनुदानमा मात्र यसलाई अघि बढाउनुपर्छ ।”

पूर्वअर्थमन्त्रीसमेत रहेका महतले विश्व बैंकबाट प्राप्त लामो समयको सहुलियतपूर्ण ऋणबाट समेत उपलब्धि हासिल नभइरहेको अनुभव सुनाए ।

“विश्व बैंकबाट प्राप्त लामो समयसम्म प्रयोग गर्ने गरी पाएको ऋणसमेत उपयोग हुन नसकेको अवस्थामा ऋणबाट बीआरआई परियोजना लिन सक्ने अवस्था छैन,” महतले भने ।