काठमाडौं । नक्कली भुटानी शरणार्थी प्रकरणमा पक्राउ परेका बेचन झालाई थुनामा राखेर अनुसन्धान गर्न प्रहरीले सात दिनको अनुमति पाएको छ ।

आइतबार जिल्ला अदालत काठमाडौंका न्यायाधीश दिनबन्धु बरालको इजालासले झालाई सात दिन थुनामा राखेर अनुसन्धान गर्न अनुमति दिएको हो ।

उनीसँगै पक्राउ परेका पूर्वगृहमन्त्री रामबहादुर थापाका छोरा प्रतीक थापालाई पनि म्याद थपका लागि अदालतमा पेस गरिएको थियो । उनको विषयमा भने भोलिमात्र निर्णय हुने काठमाडौं जिल्ला अदालतका श्रेष्तेदार रामु शर्माले जानकारी दिए ।

काठमाडौं प्रहरी परिसरका एसपी नवराज अधिकारीले पनि अदालतले झालाई थुनामा राखेर अनुसन्धान गर्न म्याद दिएको जानकारी दिए ।

उनीहरू दुवै जना शुक्रबार राति पक्राउ परेका थिए ।