खार्तुम । संयुक्त राष्ट्र संघले बिहीबार सुडानका १४ स्थानमा भोकमरी हुनसक्ने चेतावनी दिएको छ ।

“ग्रेटर डार्फर, ग्रेटर कोर्डोफान र अल जजिरा राज्यहरूका साथै खार्तुमका केहीस्थान लगायतका १४ स्थानमा भोकमरीको जोखिम छ”, संयुक्त राष्ट्रले आफ्नो वेबसाइटमा उल्लेख गरेको छ ।

वेवसाइटमा सुडानका १० राज्यका सात लाख ५५ हजार मानिस भोकमरीको विपत्तिजनक पाँचौँ चरणको सामना गरिरहेको उल्लेख छ । सुडानका ८५ लाख मानिस अर्थात १८ प्रतिशत जनसंख्या खाद्य सुरक्षाबाट पीडित रहेका राष्ट्रसंघको भनाइ छ ।

सुडान सन् २०२३ अप्रिलको मध्यदेखि सुडानी सशस्त्र बल र अर्धसैनिक र्‍यापिड सपोर्ट फोर्सबीचको घातक द्वन्द्वमा फसेको छ । उक्त द्वन्द्वका कारण १६ हजार ६५० भन्दा बढीले ज्यान गुमाइसकेको मानवीय मामिलाको समन्वयका लागि संयुक्त राष्ट्र संघको कार्यालयले जनाएको छ । रासस/सिन्ह्वा