पटना । भारतका प्रधानमन्त्री नरेन्द्र मोदीले बिहारको राजगिरस्थित नालन्दा विश्वविद्यालयको नयाँ क्याम्पसको उद्घाटन गरेका छन् । उनको साथमा विदेशमन्त्री डा. एस जयशंकर र बिहारका मुख्यमन्त्री नीतीश कुमार उपस्थित थिए ।

सो अवसरमा सम्बोधन गर्दे मोदीले भने, ‘मैले यसलाई भारतको विकास यात्रामा शुभ संकेतकाे रूपमा देखेको छु । नालन्दा केबल नाम मात्रै होइन एक पहिचान पनि हो । नालन्दा सत्यको उद्घोष हो कि– आगोको लपेटामा पुस्तक जले पनि र आगोको लपेटाले ज्ञानलाई मेटाउन सक्दैन ।”

उनले थप भने, “नालन्दाको ध्वाँसोले भारतलाई अन्धकारले भरेको थियो । अब यसको पुनर्स्थापना भारतको स्वर्णिम युगको सुरुआत हुन गइरहेको छ ।’

बिहारका मुख्यमन्त्री नीतीश कुमारले भनेका छन्, “नालन्दा विश्वविद्यालयको इतिहास धेरै गौरवशाली छ । प्राचिनकालमा नालन्दा विश्वविद्यालयको पहिचान ज्ञानको केन्द्रकोको रूपमा थियो । त्यहाँ १० हजार विद्यार्थी पढ्थे । दुई हजार शिक्षक हुन्थे ।”

सन् २०१६ मा नालन्दा विश्वविद्यालयलाई संयुक्त राष्ट्रसंघले ‘हेरिटेज साइट’ घोषणा गरेको थियो । क्याम्पस उद्घाटन कार्यक्रममा १७ देशका राजदूतका साथै प्रतिष्ठित मानिस सहभागी भएको जनाइएको छ । 

विश्वविद्यालयका कुलपति अभयकुमार सिंहले यस कार्यक्रमलाई ऐतिहासिक भनेका छन् । नयाँ क्याम्पसमा दुईवटा एकेडेमिक ब्लक, ४० कक्षा, जसमा ९०० विद्यार्थी बस्न सक्ने जनाइएको छ । नयाँ क्याम्पसमा ३०० सिटको सभाहल तथा ५५० विद्यार्थीलाई छात्राबासको पनि व्यवस्था रहेको जनाइएको छ । 

यो क्याम्पसमा सोलार प्लान्ट, वाटर ट्रिटमेन्ट प्लान्ट र रिसाइक्लिङ प्लान्टजस्ता पर्यावरण अनुकूल सुविधा रहेको जनाइएको छ । सो विश्वविद्यालयको इतिहास गहिरो रहेको छ । करिब १६०० वर्ष पहिला स्थापित मूल नालन्दा विश्वविद्यालयको संसारको पहिलो आवासीय विश्वविद्यालयमध्ये एक मानिन्छ । बीबीसी