काठमाडौं । काठमाडौंमा आज पनि गर्मी रहेको जल तथा मौसम विज्ञान विभागले जनाएको छ । आज पनि शुक्रबारकै जस्तो गर्मी रहेको मौसमविद् रोजन लामिछानेले जानकारी दिए । 

शुक्रबार काठमाडौंको अधिकतम तापक्रम ३३.४ डिग्री सेल्सियस थियो । “आज पनि हिजोकै तुलनामा गर्मी हुनेछ । बिहानैदेखि काठमाडौंको तापक्रम उच्च छ,” उनले भने । 

हल्का बादल लागे पनि गर्मी रहेको मौसमविद् लामिछानेको भनाइ छ । “काठमाडौंमा आज दिनभर गर्मी नै हुनेछ,” उनले भने, “राति भने वर्षाको सम्भावना छ ।” राति काठमाडौंका केही स्थानमा हल्कासम्म वर्षा हुने उनको भनाइ छ । 

“काठमाडौंका धेरै स्थानमा भने वर्षा हुने छैन । केही स्थानमा हल्का वर्षा हुनेछ,” मौसमविद् लामिछाने भन्छन् । 

उनका अनुसार काठमाडौंमा मनसुनी प्रणाली प्रवेश गरेको छैन । “मनसुन अनुकूल प्रणाली विकास भइरहेको छ । तर आज नै काठमाडौंमा मनसुनी प्रणाली प्रवेश गर्ने देखिँदैन,” उनले भने, “हालसम्म पूर्वी भू–भागमा मात्र मनसुनी प्रणाली छ ।” 

कोसी र वाग्मती प्रदेशका केही स्थानमा, मधेस र गण्डकी प्रदेशका थोरै स्थानमा तथा बाँकी भू–भागका एकदुई स्थानमा मेघगर्जन र चट्याङसहित हल्कादेखि मध्यम वर्षाको सम्भावना छ । वाग्मती प्रदेशका अरु जिल्लामा दिउँसो वर्षाको सम्भावना रहे पनि काठमाडौं उपत्यकामा भने नरहेको मौसमविद् लामिछानेको भनाइ छ ।