![उपेन्द्रको नजरमा कांग्रेस थङ्थिलो, एमाले पतनको बाटोमा](https://12khari.top/uploads/posts/Oli-Deuba-Upendra-1718088263.jpg)
काठमाडौं । जनता समाजवादी पार्टी नेपालले प्रमुख राजनीतिक दलहरुप्रतिको आफ्नो धारणा सार्वजनिक गरेको छ । अध्यक्ष उपेन्द्र यादवले जनकपुरमा जारी महाधिवेशनमा प्रस्तुत गरेको राजनीतिक दस्तावेजमा दलहरुप्रतिको हेराइ उल्लेख छ ।
कांग्रेस : प्रतिपक्षीको भूमिका समेत निर्वाह गर्न नसक्ने गरी थङ्थिलो
जसपाले प्रमुख दल नेपाली कांग्रेस आफ्नै असमक्षता र अकमन्र्यताबाट थिचिएको निष्कर्ष निकालेको छ । कांग्रेस प्रमुख प्रतिपक्षीको भूमिका समेत निर्वाह गर्न नसक्ने गरी थङ्थिलो भएको प्रतिवेदनमा उल्लेख छ ।
“आज कांग्रेस आफ्नै असक्षमता, अकर्मण्यता र नालायकीको भारले थिचिएको छ । प्रमुख प्रतिपक्षको भूमिकासमेत राम्ररी निभाउन नसक्ने गरी थङथिलो भएको छ । तथापि यो पार्टीको देशभरि फैलिएको संगठन र परम्परागत जनमत छ ,” प्रतिवेदनमा भनिएको छ, “वैकल्पिक लोकतान्त्रिक तथा समाजवादी दलको अभावमा राजावादी र कम्युनिस्टलाई भोट दिन नचाहने जनमतले यो पार्टीलाई भोट दिँदै आएको छ ।”
कांग्रेस उदारवादी लोकतान्त्रिक शक्ति भएकाले लोकतन्त्र, राष्ट्रियता र विकासको सवालमा पार्टीले सहकार्य गर्न सक्ने जनाइएको छ ।
एमाले : फेरि उठ्न नसक्ने गरी पतनको दिशामा
जसपाले कम्युनिष्ट पार्टीहरु उठ्नै नसक्ने गरी पतनको दिशामा लागेको ठम्याइ प्रस्तुत गरेको हो । सत्ताको ठूलो घटक एमालेको व्यवहारले केही वर्षमै उठ्नै नसक्ने गरी पतन हुन लागेको विज्ञप्तिमा जनाइएको छ ।
“दार्शनिक, वैचारिक रूपमा अन्योलग्रस्त र नैतिक रूपमा स्खलित भइसकेको पार्टी संगठनात्मक रूपमा मात्र लामो समय बलियो भइरहन सक्दैन । आउँदा केही वर्ष वा दशकभित्र कम्युनिस्ट पार्टीहरू भविष्यमा फेरि उठ्न नसक्ने गरी पतनको दिशामा अभिमुख छ,” उपेन्द्रले भनेका छन्, “एमालेको राजनीतिक व्यवहार र सञ्चालन गरिरहेको सरकारले यही कुरा पुष्टि गर्दछ । कम्युनिस्ट पार्टीका ठूल्ठूला नेताहरू भ्रष्टाचार, कमिसनतन्त्र तथा नैतिक पतनको घटनामा लज्जास्पद ढंगले उदाङ्गिदै छन् । आर्थिक क्षेत्रमा उदारवाद, नवउदारवादी नीतिलाई नै निरन्तरता दिइरहेको छ ।”
जसपाले कम्युनिस्टहरुले निर्दलीय व्यवस्थाका पञ्चहरू भन्दा पनि तल्लोस्तरका क्रियाकलाप र चरित्रको प्रदर्शन गरिरहेको आरोप लगाएको छ । कम्युनिस्ट समर्थक र तल्लो तहका इमान्दार कार्यकर्तालाई प्रशिक्षित गर्दै ध्रुवीकृत गर्ने प्रयास गर्ने जनाइएको छ ।