काठमाडौं । संंस्कृति, पर्यटन तथा नागरिक उड्डयन मन्त्रालय अन्तर्गतको पर्यटन विभागले सगरमाथा आरोही निर्मल पुर्जामाथि छानबिन प्रक्रिया अघि बढाएको छ । 

पुर्जाले सगरमाथा आरोहण गर्न टाँगिएको डोरी काटिएको र आरोहणमा समस्या भएको भन्ने अभिव्यक्ति सामाजिक सञ्जालमार्फत दिएपछि विभागले उनीमाथि छानबिन अघि बढाएको हो । 

“चर्चित हुने गरी अनाधिकृत सूचना सम्प्रेषण गर्ने कार्यमा संलग्न निज पुर्जा र अन्य व्यक्तिहरू उपर छानबिनको प्रक्रिया अघि बढाइएको व्यहोरा सबैको जानकारीका लागि अनुरोध छ,” विभागले सोमबार जारी विज्ञप्तिमा भनेको छ । 

पुर्जाले यही जेठ १३ गते सामाजिक सञ्जाल इन्स्टाग्राममा सन् २०२४ को वसन्त ऋतुमा सगरमाथा आरोहणका क्रममा टाँगिएको डोरीको बाल्कोनी र साउथ समिट बीचको भाग काटिएको र आरोहणमा समस्या भएको पोष्ट गरेका थिए । 

पुर्जाले रेडियो सेटमा पिक प्रमोसन प्रा.लि.का बाबु शेर्पासँग कुरा गर्दै पिक प्रमोसनका शव व्यवस्थापन टोली डोरी नभएको कारणले फर्किनु परेको भन्ने आरोप लगाएकोप्रति गम्भीर ध्यानाकर्षण भएको विभागले जनाएको छ । “निज आरोही पुर्जाले लगाएको उक्त आरोपपछि पनि पायोनियर एडभेन्चर प्रा.लि.को टोलीले आज (सोमबार) बिहान १२ः४५ मा सगरमाथाको सफल आरोहण गरेको र पुर्जाले भने जस्तो उक्त स्थानमा आरोहणको लागि यस सिजनमा टाँगिएको डोरी नकाटिएको र सहज रूपमा आरोहण सम्पन्न भएको जानकारी प्राप्त भएको छ,” विभाले विज्ञप्तिमा भनेको छ ।

यस सम्बन्धमा पर्वतारोहण सञ्चालक संघ नेपालको पनि आकस्मिक बैठक बसेको र टाँगिएको डोरीमा कुनै समस्या नभएको तथा यसले नेपालको पर्वतीय पर्यटनलाई बदनाम गराएको विषयमा गम्भीर ध्यानाकर्षण भएको जनाएको छ ।“यस सिजनमा सगरमाथा आरोहणको सम्पूर्ण अभियान अन्तिम चरणमा पुगेको छ । आरोहण मार्गमा टाँगिएको डोरीको कही कतै पनि समस्या नरहेको जानकारी सम्बन्धित सबैमा प्रेषित गर्दछौँ । आरोहण गर्न बाँकी रहेका सम्पूर्ण आरोहीहरूमा ढुक्कसँग सगरमाथा आरोहण अभियानमा लाग्न हार्दिक अनुरोध पनि गर्न चाहन्छौँ,” विभागले भनेको छ । 

पर्यटन विभाग, सगरमाथा आधार शिविरमा रहेको फिल्ड कार्यालय र सम्पर्क अधिकृतबाट सम्प्रेषित हुने आधिकारिक समाचार बाहेकका भ्रामक सूचना प्रवाह गर्ने र समग्र रूपमा नेपालको पर्वतीय पर्यटन एवम् राष्ट्रको इज्जतमा धक्का पुग्न सक्ने गरी उक्त अफवाहको पछि नलाग्न विभागले अनुरोध गरेको छ ।