काठमाडौं । सहकारीको बचत अपचलन र ठगी प्रकरणमा बन्ने भनिएको संसदीय समितिको कार्यादेश (टीओआर) बनाउन कार्यदल छलफलमा जुट्न लागेका छन् । त्यसका लागि केहीबेरमा बैठक सुरू हुँदैछ ।
कानुन मन्त्रालयमा दिउँसो ३ बजेका लागि बैठक बोलाइएको भए पनि कार्यदलको बैठक अघि सत्तारूढ दलहरू छलफलमा बस्न लागेका हुन् । त्यसपश्चात् मात्र कार्यदलको बैठक बस्ने एक सदस्यले जानकारी दिए । “सुरूमा सत्तारूढ दलको बैठक केही बेर छुट्टै बस्छ । शीर्ष नेताहरूको भनाइअनुसार मध्यमार्गी के हुन सक्छ भनेर छलफल हुन्छ । अनि मात्र कार्यदल बस्ने हो,” ती नेताले भने ।
मंगलबारको बैठकमा प्रमुख प्रतिपक्ष दल नेपाली कांग्रेसले मध्यमार्गी प्रस्ताव ल्याउन सत्तारूढ दललाई अनुरोध गरेको थियो । कार्यदलमा सत्तारूढ दलहरू गृहमन्त्री रवि लामिछानेको नाम तोक्न तयार छैन भने प्रमुख प्रतिपक्ष दल नेपाली कांग्रेसले रविको नाम नतोकिएसम्म टीओआर नमान्ने र समिति गठन नहुने बताइसकेको छ ।