काठमाडौं । गल्फ भन्नासाथ मंहगो खेल हो भन्ने सोच आम मानिसको हुन्छ । यसमा आवश्यक पर्ने सामानहरुले पनि गल्फलाई महंगो बनाउँछ । 

तर, अब भने एक हजार रुपैयाँमा नै गल्फ खेल्न पाइने भएको छ, त्यसका लागि पनि गल्फ कोर्स धाइरहन पर्दैन । 

ललितपुरको पुल्चोकमा खुलेको सेभेन आइरन रेस्टुरेन्टले गल्फ पारखीलाई भर्चुअल गल्फको सुविधा उपलब्ध गराउन थालेको छ ।

शाश्वत ढुंगाना र आश्रय ढुंगाना दाजुभाई सेभेन आइरनका सञ्चालक हुन् । 

शाश्वत पेसाले इन्जिनियर हुन् । सिभिल इन्जिनियरिङको अध्ययन पूरा गरेका शाश्वत पेसाले अनुसन्धानकर्ता (रिसर्चर) हुन् । आश्रय अध्ययनका क्रममा अमेरिका रहँदा उनका गल्फ खेल्ने साथीहरु एनसीएए डिभिजन थ्रीमा थिए । 
त्यहाँ रहँदा आश्रयले साथीहरुबाटै गल्फ सिके ।  अध्ययन सकेर नेपाल फर्किदा आश्रयले गल्फ सेट लिएरै आए ।  नेपालमा लामो समयदेखि गल्फ खेलिरहेका मामा प्रभावकर अधिकारीसँग उनले गोकर्ण गल्फ कोर्समा १५ दिनको कोर्स लिए । 

गल्फमा लगाव र रुची भएका आश्रयले आफूसँगै दाइ शाश्वतलाई पनि गल्फ पारखी बनाए । ढुंगाना दाजुभाई गोकर्णमा वार्षिक सदस्यता लिएर नै खेल्न जान थाले ।  तर नेपालमा जति व्यक्तिहरु गल्फमा रमाउनुपर्ने हो त्यो नपाएको देखेपछि उनीहरुले यसैमा केही गर्ने निधोसहित खोले, सेभेन आइरन । जहाँ भर्चुअल गल्फ खेल्न र प्रतिष्पर्धा गर्न सकिन्छ । 

भर्चुअल गल्फको प्रकृति सामान्य गल्फको जस्तै हुन्छ । तर, यसमा आउटडोर १८ होलमा जसरी खेलाडीले लामो दूरी तय गर्नुपर्दैन । गल्फ सेटमा रहेका विभिन्न डिभाइसहरुले एक पटक प्रहार गर्दा १० देखि १५ वटासम्म तथ्यांक देखाउँछ । गल्फ प्रवर्धनको सोच भए पनि उनीहरुमा भर्चुअल गल्फबारे खास जानकारी थिएन । 

त्यसैबेला गल्फ जगतका हस्ती टाइगर वुड्स, पीजीए र रोय क्याकोएगले भर्चुअल गल्फ लिग आयोजना गर्न लागेको सुनेपछि ढुंगाना दाजु–भाइले पनि यसैमा सुरु कसे । 

अहिले सेभेन आइरनले बिहान आठ बजेदेखि बेलुका १० बजेसम्मै सेवा दिइरहेको हुन्छ । सेभेन आइरनमा गल्फसँगै सेवाग्राहीले रेस्टुरेन्टको पनि आनन्द लिन सक्नेछन्  । 

गत वर्षको वैशाखमा सुरु भएको यहाँ गल्फ सिक्नका लागि एकेडेमी पनि छ । इच्छुक खेलाडीले ५०० रुपैयाँमा एकेडेमीबाट सिक्न पाउँछन् ।  सेभेन आइरनले गल्फरलाई आवश्यक पर्ने सामग्री र अन्य पोशाक पनि एकै ठाउँमा उपलब्ध गराउँदै आएको छ । 

तर, यहाँ खेल्न आउनेहरुले भने गल्फका कुनै पनि सामग्री आफूसँगै ल्याउन पर्दैन ।  पछिल्लो समय फुटसलले काठमाडौंका युवालाई आकर्षित गरिरहेको छ ।  भर्चुअल गल्फले पनि त्यसरी नै विस्तारै युवालाई आकर्षित गर्नेमा विश्वस्त छन्, ढुंगाना दाजुभाई । 

गल्फ प्रवर्धनकै निम्ति सेभेन आइरनले काठमाडौँका विभिन्न विद्यालयसँग सहकार्यसमेत गरेको छ ।  नेपालमा भर्चुअल गल्फको नयाँ अवधारणमा रमाइरहेका ढुंगाना दाजुभाई विस्तारै यो देशभर फैलिनेमा विश्वस्त छन् । 

परिस्थिति मिल्दै गए ढुंगाना दाजुभाइले सेभेन आइरनलाई पनि देशभर लैजाने योजनामा छन् । सरल र सुलभ रुपमा गल्फ उपलब्ध गराउने लक्ष्य राखेको सेभेन आइरन आफैले प्रतियोगिता समेत आयोजना गर्दैछ । 

प्रतियोगितामा सहभागीले हप्ताभर आफूले चाहेको समयमा प्रतिस्पर्धा गर्न पाउँनेछन् । प्रतियोगिताका निम्ति मिति समेत तय भइसकेको छ, अब तपाईंहरुले पनि उक्त मिति छिट्टै थाहा पाउनुहुनेछ !